近年興起露營熱潮，當然露營嘅好處就一定多過壞處啦~今日小編同大家分享由英國《holiday parks》分析，露營對健康嘅6個好處，唔知大家有冇同感呢？
首先小編要分享個人感受先，大約6年前第一次接觸露營，而且仲要係喺日本山上，感受到露營原來好正。話說6年前去廣島自駕遊，因為需要跨縣，途中一晚選擇咗露營體驗吓， 當時第一次接觸日本收費營地，而且亦訂咗露營用品一條龍服務。但去到咩都唔識，職員有耐心咁教我哋點樣用，就係咁開始咗人生第一次嘅露營，感受到同大自然原來可以咁近，比起住酒店更加正更加開心，小編之後就愛上咗啦！
唔知你哋又因為咩原因愛上露營呢？好啦開始講講露營嘅6個好處~
1、露營學識解決問題
專家分享，露營時經常會遇到平時不會遇到到嘅問題同挑戰，有啲甚至靠Google都無法解決，好似如何起帳篷、點樣收帳、突然落大雨點算、正確判斷天氣同潮漲潮退狀況等， 多數都係要從錯誤中學習，同要靠經驗累積先學醒，例如赤徑。
而且每一次的露營都有唔同嘅體驗，每次都會有新發現，研究證實當人面對新事物同挑戰，都可以保持大腦健康，更令我哋養成獨立思考，增強自信、滿足同幸福感添。
2、露營對孩子教育正面
根據第一點，露營對兒童成長發展有正面、積極影響。特別係科技發達嘅年代，梗係好過對住部電話或者平板電腦。
露營可以令孩子脫離電話，接觸大自然、遊玩、探險，呢啲體驗完全係平時喺屋企冇辦法感受到嘅，同時可以培養能力，克服問題同挑戰，增加學習機會。英國普利茅斯大學教育學院一項研究調查發現，絕大多數家長認同，露營對孩子教育有積極嘅影響，係成長過程很重要嘅經驗。
3、露營可以改善睡眠
美國科羅拉多大學研究發現，露營可以重置我哋嘅生理時鐘，並可以幫助難以入睡、睡眠質素差、失眠、連賴床都可以改善？原來因為係屋企有太多誘惑，工夠作已經夠忙，但我哋仲會追劇、打機等⋯⋯但係露營時，可以直接拋低呢啲習慣，晚飯後基本上無咩做，所以能更悠閒咁享受大自然、早早入睡同早起。
專家發現，因為平常生活入面充斥光害嘅影響，露營可以接觸自然的明暗循環，呢種作息生活同鄉間吻合，你會發現睡眠充足後嘅自己，精神更旺盛、注意力會比平時更好。
4、露營會增加維他命D
維他命D來源天然，可以透過日光照射吸收，係皮膚表皮下層嘅化學反應，因此接觸日光絕對係直接產生維他命D嘅簡易方法，只要一天暴露係陽光約10分鐘，人體自身即可產生足夠維他命D。
喺繁忙嘅都市生活，每個人接觸陽光嘅機會都愈來愈少，甚至因為怕熱寧願喺室內嘆冷氣，但露營就唔同，在適當陽光照射下，身體會更健康。
5、露營令你增加運動量
香港人長時間喺室內工作，甚少運動。露營時你會周圍探索新事物，又會諗方法盡快Setup好各種用具，等到處理完一切後又要準備煮嘢食啦，運動量其實比平時多，對於平時缺乏運動習慣嘅你，露營絕對係一個唔錯嘅運動。
6、露營令你更開心快樂
最重要嘅好處，露營可以令自己更開心，有改善心情嘅作用，仲有忘記煩惱嘅魔力？
專家話原來同血清素有關，它屬於神經傳遞物，是幸福及快樂感覺來源之一。血清素對人體有好多好處，包括調節心情、食慾同睡眠，另外仲可以有增進記憶及學習嘅作用，當人缺乏血清素時，容易有發怒、焦慮、疲勞、慢性疼痛同焦躁不安嘅症狀。
透過接觸大自然可以刺激大腦、舒緩身心、增進健康，呢個就係露營會令人身心快樂嘅主因之一，另外露營可以令到一班朋友或家人更互動， 透過露營可以增進感情同回憶。
如果你未試過露營，請踏出露營嘅第一步
英國Holiday Park呢篇文章真係寫得幾好，喜歡露營嘅人都明白講緊啲乜嘢， 如果你未去過露營！睇完呢篇文不妨嘗試踏出你嘅第一步， 無論喺香港或者去旅行時候都可以考慮試吓， 放假拋低一齊，感受露營同大自然比到自己嘅感覺，好好享受。
*相片來自HKCAMP
約定大家，我哋營地相遇啦！
**以後關於露營圖片及分享，記得打Hash Tag（#HKHKCAMP）
Comments