性價比高企榜首! Daiso必買露營產品!

已更新:5月3日

相信好多谷友都同小編一樣, 放假無野做就會去行下Daiso,貪佢啲野平、靚、正,少少錢都可以買到心頭好。而且仲有專為露營而設嘅counter,一次過滿足晒幾個願望。


小編搵嚟網民推介最愛產品,又抵買嘅露營用品同大家分享啦!


 

一齊從一個Mestin開始

要講係Daiso尋到嘅寶物, 當然要數Mestin。應該大部分谷友營友都有一兩個傍身。小編都唔例外。第一個係Daiso買嘅露營產品就係佢。想睇返之前嘅分享,可以按此


有柄Mestin,真係可以一個走天崖。皆因佢係由具有良好導熱性嘅鋁製成,傳熱快,做煲做鍋都可以。仲有Size分,勁正!


 

超強組合燒烤架加Mestin

烹飪嘅時候,Mestin放係燒烤架上就可以防止佢係燃燒器嘅三腳架滑落,而且細細塊,便於攜帶,用黎烤麵包,一流。加上價錢勁抵玩,識買一定買佢!



 

營廚必備調味品收納袋

作為大廚,去露營都一定會帶齊一樽兩樽唔同配搭嘅調味料及香料。呢個調味品袋仔就啱哂。一個小袋子配埋六個收納樽仔。 袋內仲可以用膠帶固定位置,調味料、湯包及香草都可以放哂入去, 甘就唔怕帶漏嘢啦!





 

卷頂式防水袋

另一個必買產品就係呢個有兩個尺寸嘅防水袋, 15L及5L。15L水袋可以掛起,行山嘅朋友就啱哂。


咪以為佢平,就以為佢防水能力流流地,呢隻防水袋屬於IPS6等級,即係即使從四面八方被強力噴射,都無有怕。用黎擺放睡袋,羽絨,衣物就至正。




 

極輕巧可旋入式不銹鋼筷子

平時帶去露營嘅筷子大多比較長,呢款筷子可以分拆,利用中間螺絲連接,帶出去野餐露營都好方便。 而且用耐熱不銹鋼物料製造,環保又耐用。



 

物超所值仲有咖啡機

終極抵買仲有呢款手磨咖啡機。咖啡機磨豆位置用陶瓷製造,唔會變熱而破壞咖啡豆香。一次可以炮製兩杯咖啡,約可磨20克咖啡豆。尺寸約高 17 cm x 直徑約 7.5 cm,重約 400 g。無論帶去露營,定留喺屋企用都非常正,唔怪得一推出就即刻賣斷市。




 

小編最愛去Daiso shopping搵平、靚、正露營小物。唔知大家又有冇發掘到啲正野呢?歡迎大家留言分享下。


約定大家, 我哋營地相遇啦!~




*相片及資料來源: Daiso


**以後關於露營圖片及分享,記得打Hash Tag(#HKHKCAMP