• HKCAMP

專訪香港頂架會Rack Rider會長傾偈~入嚟話你知~

已更新:2021年11月25日

唔好意思遲咗出,早前提及嘅戶外用品及運動博覽, 係11月7日已經完滿結束啦. 小編當然有入場睇下有無正野啦~

現場目測所有攤位都非常爆滿. 除左有不同類型戶外用品之外, 仲有運動用品, 食品, 露營用品, 運動服飾及小遊戲.


其中一個值得一睇嘅係車頂架display. 有時營人出外露一露, 大大小小裝備都真係好難拎. 車頂架就可以配合到我地一眾營人嘅需要. 可以儲物之餘, 原來加係車頂都好有型. 無論係咩車款, 加左車頂架就會變左另一種風格. 我地仲有幸可以同香港頂架會Rack Rider會長傾計, 分享下心得.


 

H: HKCAMP

R: Rack Rider


H: 請介紹一下你地Rack Rider好嗎?

R: Rack Rider香港頂架會, 集合好多玩頂架嘅車. 香港其實都有唔同車會, 多數都係某一種車款, 但我地車會係咩類型車都有, 最緊要係有頂架. 頂架係車頂裝備, 包括一個橫Bar, 頂箱, 射燈, 車側帳篷, 籃盤, 平台, 等等.



車頂架本身係外國都好流行, 但香港路比較少, 相對黎講唔會有太多Road Trip, 近年比較多人開始玩車camp, 車中泊, 所以就開始流行用車頂架啦. 而我地group剛好聚集到玩車頂架嘅朋友. 我地想帶出車頂架實用之外, 仲想推動一種汽車文化. 不單止實用, 而且仲有style.


H: 請問大概有咩類型嘅頂架? 有咩類型是比較適合露營朋友用?

R: 車頂架basic要有橫Bar. 有夾窗邊, 有夾車頂旅行架, 有吸盤. 其次係上邊嘅裝備, 包括有車頂箱, 容量大, 又防水, 露營時候可以放好多gear. 以我自己車為例, 頂箱好細, 但可以放一個兩人營, 枕頭, 充氣用品, 煮食及爐具用品. 而車側帳篷都經常會用到, 拉出黎有1.25米. 橫Bar通常用 不鏽鋼以及鋁造成, 所以非常耐用. 如果鍾意夜營, 可以裝射燈. 所以全部配件都需要有一個車頂架先可以裝到.


H: 車頂架會唔會都有分初階, 進階版本呢?

R: 個人覺得如果本身架車好難裝車頂架, 但都裝到, 就係高級組啦. 外國有跑車, 開篷車, 佢地會好專業, 分配力度, 令到最終可以裝到成個架. 正常一個頂架可以承受到車重量嘅3倍. 只要計好力度分配是可以的. 但裝左頂架後, 因為風阻及重量問題, 油耗都會大左. 但相信鍾意露營人士都唔會介意.


H: 請問頂架係逐件組裝定係一Set甘裝上呢?

R: 有時可以成Set買. 但我就會用唔同牌子組裝.


H: 你覺得玩車頂架有咩樂趣所在呢?

R: 樂趣係, 當裝左橫Bar, 就可以裝好多唔同配置. 而且放左唔同裝置之後, 車嘅外觀同整體感覺都會唔同曬. 可以好Classic, 可以好越野, 完全跟車主心意去做. 至於改裝頂架費用, 就真係好難預計.


H: 如果有新手想玩車頂架, 你認為有咩地方需要特別留意呢?

R: 其實最重要係留意車高唔好超出車身長度超過1米. 同時大家最重要係要安全. 確保電線無漏電, 車頂上任何裝置及物品都安裝穩固, 確保其他道路使用者嘅安全.


H: 不如你同大家介紹下你架會長車呀.

R: 我架車本身比較輕身, 依家裝左裝備都算比較重裝. 有齊射燈, 頂箱, 帳篷. 我覺得好實用, 每個裝備都各有用途, Light bar可以照到兩邊樹旁, Spot light係越野時可以更清楚睇到地面狀況, 而頂箱我用嘅Size係最細型, 但都放到好多裝備. 體積fit到我架車.



H: 麻煩你介紹一下今次參展嘅車.

R: 今次參展嘅車都係我地谷友嘅. 好似露營寶寶. 大家都應該唔陌生. 另外, 仲有Tesla, Benz, 你睇到本身佢地外型好斯文, 但裝左頂架成個感覺唔同曬.

Tesla門框其實唔適合裝勾爪式頂架. 所以用左吸盤. 成個橫Bar有6個吸盤, 每個可以承擔220磅力, 所以非常堅固安全.

而另一架Benz, 裝左頂架之後感覺Sporty好多, 而佢裝嘅頂架係跟據車身訂造. 通常歐洲車會用, 而且價錢最貴.

另外仲有Jeep, 主要係車尾加左個廚房, 同埋側帳篷. 車頂裝左平台, 方便用黎掛唔同配件, 例如油筒, Spare軚等等.





H: 如果最入門基本有咩牌子可以選擇?

R: 現時香港主要可以考慮3大牌子. 一個係美國品牌 Yakima, 日本品牌 Inno, 瑞典品牌Thule. Yakima較通用, 咩類型車都可以裝. 而且價錢較相宜. 另外係Inno, Inno較岩日本車用, 會輕身d, 但價錢會相對貴d. 再高一個級別就係Thule, 專車專用, 特別為唔同車款訂造. 相對價錢都係最貴.


H: 你地group都會不定期有活動嗎? 或者我地可以CROSSOVER

R: 有呀. 我地鍾意玩車都鍾意聚埋一齊, 玩Camping. 我地帶嘅露營裝備唔需要用最輕, 因為有車及頂架, 所以重d嘅裝備都可以方便帶出黎. 我地預計年尾或下年會舉辦谷聚啦.



其實我地HKCAMP都非常期待可以同Rack Rider合作, 黎一個Crossover嘅車camping或者車中泊活動. 小編有幸同會長傾計, 今次真係學到唔少野呀.


如果你心思思想裝頂架,可以去Rack Rider了解更多

 

約定大家, 我地營地相遇~




**以上圖片及資料來源: HKCAMP香港人露營分享谷


**以後關於露營圖片及分享,記得打Hash Tag(#HKHKCAMP