• HKCAMP

喜愛簡約風嘅營友有福啦~日本超紅簡約戶外品牌Muraco就岩哂!

如果營友對日本露營品牌有研究, 相信一定會聽過Muraco. Muraco係紅極一時嘅日本戶外用品品牌, 專門出產極簡產品, 除左帳篷之外,仲有一系列露營用嘅餐廚用具. 講到明極簡, 即係唔會有多餘修飾. 品牌多以不死顏色黑, 白, 灰為主. 鍾意極簡嘅營友睇黎要大放血啦~

 

Muraco出品嘅飯盒, 真係名副其實嘅鐵飯盒. 但魔鬼盡在細節裡. 整個設計以軍用鐵飯盒作為雛形, 曲面設計配以黑, 灰冷色系, 真係型到無朋友. 佢特別之處係整個飯盒都包著耐熱塗層. 野炊隨時煮, 炒都無問題. 仲可以用黎做便當盒, 一物二用.

 

露營當然唔少得一個好用嘅烤盤. 但帶塊鐵去露營? 前世未辛苦過嗎? Muraco設計嘅平板烤盤, 厚度只有3cm, 重量唔重之餘, 儲熱能力非常夠. 會仲有專屬收納套, 方便隨身攜帶到戶外煮食.

 

有飯盒, 有烤盤, 當然唔少得要有燈架. Muraco出產嘅三角燈架集簡約設計及功能於一身. 三角燈架用上鋁合金製成, 輕巧且耐用. 唔好睇少佢外表輕巧, 足足可以負重12公斤, 唔止可以吊燈, 仲可以吊爐. 而且拆卸組裝都超方便快捷.

 

食飽飽, 係時候要入營帳休息啦. Muraco細心度又點止出產煮食用品. 佢地代表作之一仲有呢個全白色, 重量只有300g嘅睡袋. 以為佢輕就無咩用? 佢唔單止防水, 同時都做到透氣效果, 而且保暖效果足夠. 冬季露營點少得?

 

露營其實都係一種生活態度. 用極簡配以輕鬆嘅生活體驗, 令平時緊張嘅生活放慢腳步. 大家一齊黎渡過一個慵懶嘅露營日吧


約定大家, 我地營地相遇~




**相片及資料來源: Muraco


**以後關於露營圖片及分享,記得打Hash Tag(#HKHKCAMP