• HKCAMP

將生活態度,藝術美學融入天然食材當中!本地原創手工麵包品牌MOUSA•ΜΟΥΣΑ 專訪

已更新:2021年12月20日

出黎露營,從以前只係簡單充饑到依家煮滿一枱好西,都顯現出眾營友對食物嘅追求越來越高,唔單止講求健康、營養價值仲要追求視覺享受,要IG able。


大家有無唸過食物都代表一個人嘅生活品味同態度,小編睇到谷友分享露營時烹調嘅美食相,張張都係品味人生,張張都係生活態度。


係今年UNIO 21A露營活動中,小編認識到一位用心對待食材、將藝術、美學融入天然食材嘅麵包師,而佢造出黎嘅麵包唔單止IG able,仲係全天然全人手製作絕對適合同閨蜜,伴侶去露營同野餐享用。


講緊嘅係本地原創手工麵包品牌MOUSA•ΜΟΥΣΑ ,品牌創辦人Cato係一個土生土長80後女生,小編試過佢造嘅酸種麵包及橄欖醬,真係一試愛上,今日好開心可以同Cato做專訪,同谷友分享呢個開心大發現。


 

H: HKCAMP

C: Cato @ MOUSA MOYEA


品牌理念 原自健康


H: 不如分享下品牌成立嘅理念同埋點解當初會想做麵包呢?


C: 其實我做品牌之前, 去咗希臘. 當時希望可以將中式點心帶到當地. 但可惜因為種種問題而唔可以實行. 嗰時我有飲食失調問題, 意識到要食得健康. 同時我發現酸種麵包係無油, 無奶, 無糖, 係非常健康嘅食物. 係外國都好流行. 所以我想將呢種健康食物帶返黎香港, 希望大家可以多一個健康選擇.


 


創業路上 經歷起跌 從得失中找回方向


H: 初初開始經營,有無遇到咩困難呀?


C: 其實品牌早係5, 6年前開始,當初其實無咩大困難,因為我只係為左興趣,無諗過賺錢嘅問題。從上一年開始有新Partner加入,創立另一品牌《Into the Wild》當中跌跌碰碰不停學習,我係上年先知道要點樣營運一盤生意,到今年我用返上年學到嘅野應用係依家品牌上,但當一個人去營運一盤生意時,最困難係一個人唔能夠同時處理所有問題,好似做產品、研發新產品、客服同Media溝通,文書工作等等,而管理財務、時間管理我仍然學習當中。



 

獨力營運 客人嘅欣賞就係原動力


H: 雖然甘辛苦,但當中有咩事係令你覺得最開心呀?


C: 我對產品嘅品質同外觀都好有要求,但好多時候唔係想就可以做到出黎,而最開心係自己成功做到一個滿意嘅產品出黎,有客人欣賞又覺得好味,就係令我最開心嘅事。




 

不停步 不斷創新 研發與別不同口味產品


H: 可以分享一下品牌有咩產品特別推介呢?


C: 本身MOUSA主力產品係酸種麵包,用天然酵母所以好健康,我有試過研發港式味道,例如老薑蕃薯,係原自蕃薯糖水但係無糖嘅,另一個係紅胡椒蔓越莓係我極力推介,除左酸種麵包,我都有做甜點鬆餅、撻、香蕉蛋糕等⋯⋯大部份我都會用天然代糖,,所以大家都可以食得健康。




 

將創意結合手工麵包 讓客人同時擁有視覺及味覺享受


H: 不如同大家分享下,之後會推出咩新產品呀?


C: 品牌一直使用季節性食材,我會希望每個月都有一個主題產品,例如11月係南瓜、12月係莓,都係季節性新產品,另外聖誕都會出BOX SET同聖誕花圈麵包,我一向重視產品外觀,希望每個客人除咗可以享受麵包帶黎嘅味覺享受之餘,仲有視覺享受。



 

從來創業都唔係易事,加上只靠一個人嘅力量更加困難,小編帶過Cato親手做嘅麵包去露營, 麵包放係烤架上烤,香味真係令人好難忘。小編食到嘅唔止係一個產品甘簡單,而係一份對產品嘅執著同誠意。


PS*小編收到MOUSA送來的聖誕BOX SET,超有心思~感謝


露營時, 大家不妨試試新口味, 支持屬於香港嘅本土原創品牌.

MOUSA•ΜΟΥΣΑ

FB: https://www.facebook.com/mousa.inspiration/

IG: https://instagram.com/mousa.inspiration?utm_medium=copy_link


HKCAMP會繼續努力, 發掘更多露營資訊同大家分享. 如果大家有好嘢想分享, 歡迎留言話比我哋知呀~

 

約定大家, 我哋營地相遇~



**以上圖片及資料來源: HKCAMP香港人露營分享谷

**以後關於露營圖片及分享,記得打Hash Tag(#HKHKCAMP