無論去到邊，水都係重要嘅部份。有時到私人營地玩，都希望可以近啲水源， 唔洗行咁多次呀嘛! 但如果有個好用嘅水桶， 就唔使成日兩頭行，方便勁多啦。
市面上可以選擇嘅露營水桶都非常多。今日就等小編同大家分享一下三款唔同價位，唔同品牌嘅露營水桶啦！好有更好歡迎推介。
今次分享嘅分別係從$12蚊店買嘅無牌子水袋，Captain Stag嘅水桶， 以及Colapz人氣摺疊式水桶。大家又睇睇鐘意邊隻多啲？
視乎同行人數、地點、行裝數量去選擇儲水量
有時選擇儲水容量唔一定一味靠多！要因應同行嘅人數，露營嘅地點，以及拎嘅行裝有幾重而選擇儲水容器嘅大細。 簡單來講，如果去嘅係私人場，而距離拎水地方好近嘅話，就唔需要太大容量。但如果係一家四口，或者喺偏遠地方，距離水源好遠嘅話，就需要一個多容量啦。
$12蚊店買到嘅水袋， 無標明儲水量， 但小編試過大約可以放到2L。如果好多人一齊去露營就未必夠用啦。
Captain Stag有5L儲水量。 如果一般煮食用嘅話， 都足夠應付一家三口嘅用水量。
Colapz係三款之中儲水量最多嘅水桶，有8L儲水量。 一家四口，一般煮食都無問題。唔洗來來回回拎水，一桶搞掂。
無論輕裝定重裝 收納體積好重要
一眾營友都會非常明白，出得黎露營，無論輕裝定重裝，都會有一定數量嘅裝備要拎。呢個時候，儲水器嘅收納體積就好重要啦。大家都可能會認為，收納體積越細容量就會越少。但今次小編嘅分享，有意外收穫呀。。
從$12蚊店買嘅水袋，只要排出多餘空氣，就可以摺到超扁平， 雖然容量少，但收納上黎講真係堅鏗位， 帶住佢去邊都無有怕。
Captain Stag水桶整個都用硬膠製造，所以無得摺疊收納， 比較吾方便。如果大家Car camping的話，都可以考慮帶佢。
令小編意外嘅係Colapz 嘅水桶。雖然佢係三隻儲水器當中儲水量最高，但收納方面都好方便。桶身用上可摺疊式設計，摺疊後可用彈性膠帶扣住，整個水桶重量只有600G, 拎上手唔重， 而且儲存方便，真心輕巧。
倒水無人唔識吧！ 但邊隻最好用呢？
$12蚊店嘅水袋只有一個出入水口位， 因為本身好薄身， 如果要放係地上需要調整一下水袋底部。 倒水時需要用兩隻手扶住，小朋友就未必啱用啦。而且水袋上無顯示水位位置，比較唔方便。
Captain Stag同Colapz兩款都可以好穩陣咁放係地上。而且兩款都有入水及出水兩個水口位，同時都有開關制，非常細心。
Captain Stag水桶出水嘅時候，需要長按先倒到水， 而且桶身一樣無顯示水位位置，比較唔方便。 但小編鐘意佢另一個貼心位，出水位有小蓋子蓋住， 防止昆蟲爬入， 讚！
Colapz水桶倒水嘅時候，只要將水製拉上，就可以持續倒水，而且桶身上有清晰顯示水位位置，好方便。但就無小蓋子蓋住出水位，有機會小昆蟲會爬入去啦！
耐用程度又如何？
耐用性係好緊要，好緊要嘅一環。 一個裝備要玩上好幾年， 所以都要耐用，減少浪費。
$12蚊店嘅水袋用普通膠袋做成， 耐用程度唔算高，而且膠會隨使用時間及日曬慢慢變硬及裂開， 耐用程度唔算高。
Captain Stag水桶用嘅係硬膠， 非常堅固。小編分享嘅呢個其實已經用上一段時間， 加上平時會放係露台，即使係陽光直曬之下，都唔會變形，同時膠都未見有硬化破裂，屬於耐用性高。不過小編係錯誤示範，建議大家裝備唔好放喺太陽直接曬到嘅環境會比較好，要珍惜同愛護自己嘅Gear呀！
Colapz水桶桶身使用可扭可摺嘅軟身膠, 唔怕磨蝕， 係屬於耐用性強嘅水桶。
價錢性格比係王道！
價錢方面，$12蚊店水袋係無得輸， 三款之中係最平嘅， 只需要$12有交易。
其次係Captain Stage, 約$129， Colapz約$399。
當然功能性越高，價錢會越高，都係好豐儉由人。
總結:
總括黎講， $12蚊店水袋勝在價錢平，可以摺到極平坦， 攜帶方便， 係新手嘅好選擇。但缺點係容量少， 容易破損，吾夠耐用。
Captain Stag最正係佢夠哂堅固。即使日曬都唔會有問題，耐用性強。但同時呢個都係佢缺點， 因為吾可以摺疊， 收納困難，而且睇唔到水量。
Colapz儲水量最大，岩哂一家大細，而且可摺疊，收納方便。但缺點係出口位無蓋蓋住， 而且價錢都較貴。
$12蚊店水袋依家仲有得賣， Captain Stag之前係AEON買，一出已經被搶購啦。
Colapz水桶， 如果大家想了解更多， 可到以下連結睇睇呀！
website: https://bit.ly/3C2kOyu
以上都係小編嘅私心分享， 唔知大家又會點選擇?
歡迎大家留言或者話比我哋知， 有咩新露營產品或者資訊都可以開心share㗎！
約定大家， 我哋營地相遇。
相片及資料來源: HKCAMP
**以後關於露營圖片及分享，記得打Hash Tag（#HKHKCAMP)
留言