小編最鍾意露營嘅時候周圍同大家傾計, 無意中發現, 原來營友除咗鍾意煮好西之外, 都鍾意係露營嘅時候做吓小手作, 好似木雕茶匙, 旗仔, 風箏等, 唔知大家又有無諗過做針黹呢?
回歸最簡單的快樂 ・慢活與露營的生活哲學！
最近小編認識到一個非常有熱誠嘅藝術家Toby, 佢利用「慢針黹」藝術創作, 讓大家學習慢活. 以前遊牧民族都係帶住營帳, 餐風宿露. 就好似我哋依家經常會聽到嘅走營, 都係異曲同工. 而「針黹」係祖先嘅智慧技能, Toby希望透過一針一線縫補人與衣物之間嘅關係, 並提倡衣物可持續發展. 大家可以透過藝術展示, 工作坊等了解更多關於針黹呢門工藝, 重拾一啲已忘懷嘅生活片段及回憶. 下次露營嘅時候, 大家不妨試試動動手, 一齊做下「慢針黹」藝術.
從Fast Fashion「快時尚文化」到"慢針黹牧民 @ 油街實現 "概念
Toby從事時裝行業多年, 從時裝雜誌編輯到國際品牌設計師, 亦曾擔任 agnès b. 設計經理. 佢發覺原來大家都深受「快時尚文化」唔同程度嘅影響, 衣物價值越嚟越低, 佢深思到底衣物可以為大家帶嚟咩好處, 回憶及價值呢?
所以從 2013 年起, Toby透過與唔同國際企業、環保及藝術單位合作, 推出再造時裝設計, 更以工作坊、展覽、裝置等等, 展示衣物創作嘅好處及延長織物壽命嘅概念, 用行動話比大家知原來環保可以好型格, 好有意思.
衣物就好似大家嘅日記一樣, 會為大家帶嚟唔同回憶, 無論放底幾耐, 只要一拎起就會重拾當時經歷嘅事. 而且重複嘅動作會有療癒作用, Toby係2020年開始通過Slow Stitching療癒大家心靈, 所以Toby希望透過「慢針黹」讓大家重新拎起針線, 慢慢療癒心靈. 因此就有"慢針黹牧民 @ 油街實現 "嘅概念.
Toby vs 油街實現（Oi!）一同推廣本地藝術文化
油街實現於2013年正式開放, 係香港一個以推廣藝術文化為宗旨嘅藝術空間, 為藝術工作者提供一個平台、一個機會去實現夢想.「油街實現」與地址油街12 號諧音, 喻意此地作為一個起步點, 通過不同嘅體驗, 將藝術融入大眾生活. 佢嘅英文名稱"Oi!"係一個行動號召, 邀請大家一齊共同創造，名字亦能聯想到 "Oil"及「油街」，與中文名稱相連。
大家嚟到除咗可透過藝術展示、工作坊等了解更多關於針黹呢項工藝, 更可以參觀一下油街實現內提供嘅展覽、工作坊等文化活動, 一齊感受本地藝術文化氣氛.
"慢" 與露營嘅初心一致! 感受慢活, 讓身心返璞歸真!
唔知大家仲記唔記得初初露營嘅時候係咩感覺呢? 小編記得第一次露營係人生中見過最多星星嘅一次. 雖然當時咩都唔識, 但真心全程放空, 好似差滿電嘅感覺, 過程治癒又Relax, 同時都係人生第一次體驗到慢活到底係咩一回事.
Toby希望大家嚟到工作坊除咗學習基本針黹技巧外, 更希望大家可以放下急躁, 學習慢落嚟, 嘗試專注慢慢完成針黹. 過程中大家可以體驗慢嘅威力, 有時候慢反而會比快更有效率.
利用"針黹", 學習慢下來, 細味生活
Toby從零開始推行, 希望重新教育大家. 過程中不斷思考, 當中都遇上唔少困難, 可以講係摸著石頭過河, 步步為營.
除咗口講之外, Toby希望以行動讓大家體驗. 佢相信改變唔係單靠佢個人力量, 而係需要大家一齊努力, 以人傳人將慢活, 延續物品壽命信息推廣延續落去.
Toby希望活動可以讓更多人認識及參與, 就好似遊牧民族去唔同地方, 將文化及意念傳承落去.
慢活就係露營嘅初心. 放底急速步伐， 慢落嚟感受身邊一齊， 係會帶另一番體驗。 大家下次露營嘅時候， 除咗放空、躺平之外，不妨試試好似Toby咁拎起針線， 係旗仔上繡上有回憶嘅圖案， 尋找大家嘅慢活節拍。 慢針黹牧民 @ 油街實現
展期 : 13.11.2022 – 12.5.2023
康樂及文化事務署主辦
油街實現籌劃
藝術家介紹
Toby Crispy 係LastbutnotLeast 及時間衣務所 Fashion Clinic by T 創辦人, 涉獵時裝工業多個範疇, 由時裝雜誌編輯到國際品牌設計師, 曾擔任 agnès b. 設計經理.
她覺醒「快時尚文化」需要被治療, 因此自 2013 年起, 透過與不同嘅國際企業、環保及藝術單位合作, 推出再造時裝設計, 以工作坊、展覽、裝置等等, 帶來衣物創作嘅好處, 延長織物壽命. 2016 年佢將 Fashion Clinic 融入生活, 並係 2020 年添加咗「by T」, 強調衣物中時間 (Time) 及故事 (Tale) 嘅意義, 以日常衣物代替時鐘, 記錄時間及經歷. 佢堅信再生設計能充分利用資源, 從根本減少過度消耗及浪費。
*圖片來源: HKCAMP / Toby Crispy / 油街實現
HKCAMP新一系列回歸最簡單的快樂・探索慢活與露營的生活哲學！生活在香港，我們經常被快節奏的生活所壓迫，總是在忙碌，卻忽略了自己的健康。慢活與露營系列，是探討露營及慢活的生活方式，讓我們試試放下煩惱，享受大自然的美好。
**以上圖片及資料來源 : HKCAMP / Toby Crispy / 油街實現
**以後關於露營圖片及分享，記得打Hash Tag（#HKHKCAMP）
留言