香港車中泊,媽媽寶寶同黎志偉一齊分享有趣經歷!

已更新:8月24日

《車中泊》一詞來自日本,意思指在車中住宿!日本其實已經興起一段時間,YouTube睇到喺日本車中泊己經百花齊放,日本更有一個女仔+車,用車中泊方式玩晒成個日本。


而近幾年香港亦有人開始玩啦,更慢慢做就咗港式車中泊!HKCAMP今次就同《車中泊露營社》兩位會員媽媽寶寶同黎志偉一齊吹吹水,分享喺香港玩車中泊嘅有趣經歷,心思思想玩就要睇睇啦。


黎志偉就今次訪問更想帶出,即使坐輪椅或身體不便,同樣可以玩車中泊及露營享受大自然,鼓勵行動不便者要出外走走感受一吓。


 

因車中泊而認識仲做朋友


令到小編意外嘅係原來黎志偉先生係車中泊愛好者?一個媽媽、一個係前包山王,就係因為車中泊成為好朋友,閒時會約一大班朋友一齊出車,今日同大家分享,佢哋喺香港車中泊經歷。


B: BoBo 黎: 黎志偉 問: 咩原因會令到你哋接觸同嘗試玩車中泊? B: 其實自己一直都有玩露營,以前孭住背囊同裝備就上山去露營!不過之後有咗BB同近年政府營地因疫情所以關閉咗,自己就諗不如試吓車中泊啦,反正自己有架車。就係咁開始咗車中泊,當時仲要渣JAZZ (笑),之後仲換心水車中泊車,跟住日本YouTube片設計車內所需,添加唔同裝備貼合自己需要。

黎: 未發生意外之前,其實我都有玩開露營,買齊哂裝備,但意外後要坐輪椅就一直無再接獨差不多十年,直到2021年發現原來香港有人玩車中泊,其中一個就係BOBO,加上香港唔少地方都可以揸車去到,就係2021年10月開始試玩車中泊,由於身體不便我車內嘅設備亦都花過心思設計;一定要可以隨手就攞到,仲有車外用品經過好多經驗之後,發現原來用一個箱裝住對於坐輪椅嘅我黎講方便好多,唔使行多幾轉。

問: BOBO帶住囡囡去車中泊,會唔會比自己一個人去困難呢? B: 帶住囡囡的確有好多嘢要兼顧,例如要將車內部設計加入囡囡喜歡嘅元素,諗定佢想食啲咩,更要諗清楚安全問題。不過佢其實好喜歡大自然,戶外空間大,好多時囡囡會玩吓花花草草,享受大自然環境

問: 有冇試過同屋企人一齊車中泊? 黎: 有同老婆同仔仔放假時一齊係香港周圍車中泊,就好似自駕遊咁去到邊食到邊,一去就咁三日兩夜,一家人都好享受呢啲時光!今日又帶咗仔仔出嚟車中泊。


 

問: 兩位車中泊有咩最深刻嘅經歷? B: 大部份車中泊經歷都好開心,不過有啲幾得意嘅經歷,曾經有一次喺係山上煮和牛, 因為太香吸引咗一家野豬過嚟,當時好驚,即刻閂車尾門,聽到啲豬不停咁叫都驚險,最後就慢慢散去。

黎: 有一個幾特別嘅經歷,就係當時一個人去九龍區搵地方車中泊,但最後發現原來九龍真係無咩地方適合,突然諗不如試吓直接喺鬧市入面車中泊,結果我喺太子訓咗一晚,第二日起身一開車內窗簾條街周圍都係人,當時我仲喺車入邊刷牙,外面嘅人仲好好奇望住我,呢個感覺好有趣, 都係一種體驗。



問: 有冇咩車中泊嘅裝備介紹比大家?


黎: 我會推介我車內嘅冷氣機,好少人會咁裝,另外車中泊一張好嘅床墊都好重要。



 

問:越來越多人接觸車中泊,有冇啲咩可以同入門新手分享?


B: 睇睇身邊有冇玩車中泊嘅朋友,了解咗先!如果無朋友玩就上網睇睇,同朋友出多啲去試玩,之後就會知道自己想要咩設備放入自己架車到,再周圍發掘新地點問題: 之後將會有啲咩新動向? B: 而家天氣熱,等之後天氣涼啲《車中泊露營社》會有聚會,推廣吓港式車中泊,到時請HKCAMP一齊玩


黎: 嚟緊想係香港發掘一啲車到嘅爬山地點,又可以玩攀石又可以車中泊,搵到會再同大家分享。


 

唔難發現兩人都係從露營開始,之後再接觸車中泊。露營相信會係第一次比大家接觸到係大自然過夜嘅感覺,後來慢慢按個人喜歡會再玩汽車露營、車中泊、Glamping。而香港更有自己特色嘅車中泊,今次兩位都係《車中泊露營社》嘅會員,想了解更多車中泊就去睇睇啦。 *如果想親睇見到車中泊露營社嘅靚車,嚟緊9月18日係中環海濱《香港露營文化祭2022/ HKCAMPING FESTIVAL 2022》,會展示多架車比大家近距離接觸了解車中泊,活動詳情可按此

PS* 感謝黎志偉先生

約定大家, 我地營地相遇~

以後關於露營圖片及分享,記得打Hash Tag(#HKHKCAMP



相片來源: HKCAMP & Bobo & 黎志偉 拍攝: Add 編: Sky仔