全港最佳睇日出清單・記得bookmark！

全港最佳睇日出清單，4個地點隨時睇最靚日出！由BB及到高級都齊嗮，仲有HKCAMP戶外攝影方法，打卡話咁易快啲Bookmark同send比朋友。

露營多年，小編見過太多人元旦上山凍到變雪人，或者去到先發現「乜都睇唔到」。呢份清單係HKCAMP去過、結合攝影方港、打卡位同埋安全分級嘅指南。

NO.1：西貢灣仔南/半島- 灣仔南營地—— 新手友善嘅金光水面 (新手級 *一家大細/情侶首選)

賣點：設施齊全，適合一家大細望住大灘海日出，海面會變金色。

點解係呢度？ 呢度海拔低，適合帶埋小朋友或者另一半。日出嗰陣，大灘海會變成金色。

【拍攝貼士】：

• 人像剪影：叫另一半企喺水邊，你逆光影，將曝光補償調低 (EV -1.0)，可以影到非常有 Feel 嘅黑金剪影。

• 避人法：元旦好多人，你嘅帳篷門口一定要向正東，咁你唔使出門口，拉開門簾已經可以睇到日出。

【新手級：一家大細/情侶首選】

• 難度：★☆☆☆☆ (極易)

• 路況：石屎路為主，坡度平緩。由黃石碼頭坐船直達，只需步行約 10 分鐘即到營地。

• 安全提示：設施完備（有廁所、水源），適合第一次睇日出嘅新手。注意傻日人多，請提早到達佔位。

---

NO.2 東龍島 - 東龍島炮台 —— 電影級嘅海平線日出 (*難度中等)

賣點：香港最東面嘅島嶼之一，日出由海平線升起，視覺極震撼。

點解係呢度？ 避開碼頭公眾營地嘅喧鬧，呢度有 270 度海景，日出會由海平線直接跳出嚟。

【拍攝貼士】：

• 魔幻時刻：1 月 1 日日出係 07:03，建議 06:35 就 Set 好腳架。

• 構圖：當太陽由海平線升起，暖橘色嘅光會照亮粗糙嘅石紋，同遠處平滑嘅海面形成強烈對比。呢種相最有「歷史見證第一道光」嘅故事感。

• 光差處理：海面反射好強，如果冇減光鏡，建議用手機嘅「人像模式」或「長曝光」功能，等海面平滑如絲。

【進階級：懸崖邊界注意】

• 難度：★★★☆☆ (中等)

• 路況：由東龍洲公眾碼頭出發，沿水泥徑向北行，大約需要步行 30-40 分鐘。前往炮台的路徑雖然清晰，但進入遺址範圍後，地面為天然草地及不平整的古老石磚，行走時需加倍小心。

• 安全提示：炮台遺址位於海邊高地，周邊部分圍牆已損毀，深夜或清晨光線不足時，切勿靠近崖邊或亂石堆。如清晨遇到大霧或強風，請留在炮台內圍避風處，切勿嘗試去岸邊拍浪，安全第一。

---

NO.3：大嶼山昂平營地 - 鳳凰山 —— 佛系寧靜日出

賣點：鳳凰山雲海之上嘅第一道，有一種洗滌心靈嘅感覺。 (難度：★★★★☆ 中至高等)

點解係呢度？ 有一種其他營地冇嘅莊嚴感。路線昂坪營地 → 心經簡林 → 鳳凰徑第三段（天梯）登鳳凰山頂，有一種其他營地冇嘅莊嚴感，適合經驗豐富的行山者。

【拍攝貼士】：

• 對比色：鳳凰山喺日出前係藍調 (Blue Hour)，當太陽一出變成暖橘色，呢種冷暖對比係最吸睛嘅 IG 相。

• 焦段選擇：如果有長焦鏡，畫面會變得好壯觀。

【進階級：體力小考驗】

• 難度：★★★★☆ (中至高等)

• 路況：從營地出發，沿鳳凰徑第三段（天梯）登頂鳳凰山，欣賞香港最美日出之一，常有雲海，氣勢磅礡。

• 時間: 建議凌晨3-4點從營地出發，需2小時上山。但入夜後路段漆黑。

• 安全提示：足夠食水及防寒衣物，此處風力較大，入夜體感溫度低。請帶備頭燈，切勿單獨行山。

---

NO.4：大埔 - 三門仔BB級別 ( 難度：★☆☆☆☆ 極易 -全平)

賣點：全港最輕鬆嘅日出點，無須體力勞動。擁有獨特嘅「避風塘漁船剪影」，配合遠處馬鞍山同八仙嶺嘅山脊線，可以影到一份極具詩意、充滿漁村風情嘅第一道光。

點解係呢度？ 對於 2026 年第一日唔想爬山涉水、或者帶住家人小朋友嘅營友，呢度係「性價比」最高嘅位。三門仔面向正東偏南，配合平靜如鏡嘅避風塘水面，係攝影愛好者同新手嘅天堂。

【拍攝貼士】：

• 獨特風景: 利用避風塘停泊嘅小漁船做中景。當太陽升起，金光灑落，小船嘅剪影會令張相非常有故事感。

• 延時攝影 (Time-lapse)：將手機固定由 06:40 開始影，你會錄到雲霧喺流動嘅震撼畫面。

  
  

  【BB級：任何人仕或揸車都好方便】

• 難度：★☆☆☆☆ (極易)

• 路況：全石屎平路，零爬升。由大埔墟站坐20K 小巴或74K巴士到總站，落車行 5 分鐘就到海邊堤霸，揸車話踩單車係最好方法。

• 提示：呢度係最簡單嘅地點，亦都可以選擇喺附近營地紮營，凌晨再前往睇日出

新一年開始，整一個細細哋嘅 【HKCAMP私密密友谷】。我想喺入面同真正識貨嘅營友，每日分享一啲避坑指南、即時天氣預警，同埋一啲我唔想喺大Group講嘅真心話。

每月只係 $15（大約係一罐M記可樂嘅價錢），純粹係想支持我繼續去搵更多好地方，同埋過濾返一班真誠嘅戰友。

*以上資訊僅供參考，露營及行山活動具備一定風險。出發前請評估個人體力及天氣狀況。山野天氣變化莫測，請自備充足防寒衣物及照明設備。HKCAMP 僅提供資訊分享，並不對任何意外負上法律責任。請各位營友實踐 Leave No Trace (山野無痕) 原則，保護我哋嘅大自然。