之前同大家講過係D2 Place嘅「呀~~露夏露營市集」 已經舉辦完啦. 小編當然有出去八下啦, 今日就等小編同大家分享一下啦~Let's go
DLGM二手露營市集, 今次已經係第五次舉辦啦. 顧名思義, 就係比一眾「營」友一個平台可以分享大家嘅心頭好, 用平靚正既價錢買到二手露營裝備. 市集分開左兩個會場, 一個係D2 Place一期二樓, 一個係二期地下.
小編現場目測, 除左二手裝備之外, 仲有一半攤位係賣全新裝備嘅. 而且有吾少攤位都係新進設計師, 本地原創, 真係要支持一下呀.
當日真係人頭湧湧, 見到吾少「營」友~而且攤位數量都比預期嘅多. 想執到寶嘅「營」友就要慢慢行, 慢慢尋寶啦.
當中有不少至潮至新嘅露營產品, 大部份攤位負責人都非常樂意為大家講解架~
買完必須裝備, 當然要睇埋露營嘅周邊產品啦. 由本地設計師品牌設計嘅山系時裝Yama Guest. 無論用料抑或設計, 都fit曬一眾行山露營朋友嘅需要.
小編現場所見, 佢地嘅產品設計真係好有功能性. 褲袋有排走沙石嘅設計, 仲有隱形口袋方便擺放隨身物品. 而物料多用輕身布料, 可以睇得出佢地嘅設計真係好有誠意. 露營都可以著出自己獨特個性同fashionable, 小編都搵到心頭好啦~
場內仲搵到拎去行山露營時食嘅風乾果乾. 佢地嘅果乾都係自己手造嘅. 而且細細包, 方便拎去露營同行山. 仲有手雕木工手作, 攤位主人想做一個可以比大家露營時IGable嘅木盤, 配上原木手雕嘅木湯匙, 去露營時一邊放空一邊手雕自己嘅木匙, 真係好減壓呀.
小編係市集內搵到不少露營擺設, 有旗仔, 露營燈飾, 燈罩等.
呢個人手摺成嘅燈罩真係好吸引呀. 店主話燈罩係佢地一班志同道合嘅「營」友一齊構思出黎, 裝作過程需要三小時, 而且每一摺都係人手手摺出黎, 誠意度十足. 而且好有日系風情, 即使吾係露營使用, 都可以用係日常生活之中, 係一個好有格調嘅設計呀.
買齊物資, 係咪急不及待要出發呢? 係D2 Place二期搵到一個私人營地嘅攤位. 營地嘅營區分左吾同級別. 有發燒級, 享受級同埋入門級. 最吸引嘅地方係, 即使大家無準備任何營具, 什至即興想約埋一班朋友入營, 只要大家一個電話, 營地員工就會為大家安排.
營地設有日營, 有樹屋及繩網多項歷險活動, 如果想玩全日, 可以先玩日營, 再按需要選擇營區. 營地9月中就開季啦, 大家想參加, 就要留意佢地8月嘅IG/FB啦.
行左幾個鍾, 相信大家都滿載而歸. 小編都放左吾少血. 呢次活動最令小編印象深刻就係可以同「營」友互動, 大家互相交流對露營, 營具同生活態度嘅睇法.
希望將來HKCAMP-香港人露營分享谷及其專頁, 都有機會同大家舉辦類似谷友活動. 吾知大家又點睇呢?
約定你, 我地營地相遇~
**相片來源: HKCAMP**
**以後關於露營圖片及分享，記得打Hash Tag（#HKHKCAMP）
相關文章: D2 Place活動介紹