福岡海景露營・兩日一夜行程分享 (營地編)
- HKCAMP
- 8月28日
- 讀畢需時 3 分鐘
已更新：9月1日
HKCAMP Glamping Holiday系列又嚟啦！話說上次去咗台灣體驗山中露營及車中泊，早排小編又心思思，同老細講係時候要拍Glamping Holiday系列啦! 於是先斬後奏喺IG度問大家: 想睇我哋去日本邊度露營呢？估唔到日本福岡竟然大比數勝出，最後成功出發 (笑)。
有別於一般YouTube旅行影片，今次影片拍攝大部份與戶外同露營有關，仲去晒福岡特別嘅戶外及露營店舖，喜歡露營嘅朋友記得bookmark。
福岡適合快閃旅行露營・享受大自然
福岡非常適合快閃旅行，由香港飛福岡只係3小時，而福岡機場出去市區都只係15分鐘車程， 實在太方便，絕對適合週末快閃，輕輕鬆鬆玩一轉。小編相信睇開HKCAMP嘅都係喜歡戶外或者露營嘅朋友， 所以市區景點今次就唔多講啦！
Resort Glamping令你更輕鬆預訂日本露營場地
今次旅程正正八月出發，全日本都處於酷熱天氣，平均每日有33度以上，係選擇營地時，如果想休閒舒適一啲，一定要選擇Glamping。
預訂日本Glamping場地，我哋會推介日本Resort Glamping，平台提拱全日本唔同豪華露營住宿，選擇多達200個。最重要係平台使用全中文，大家唔使再擔心語言溝通問題， 令日本旅程更加輕鬆。
海景豪華露營極放鬆・冇得輸
甘多個豪華露營地點， 最終我哋選擇左位於福岡福津市嘅海景場地GLAMP DOME FUKUOKA FUKUTSU。 場地距離博多只需50分鐘車程，而且周邊有海灘同埋著名景點《宮地嶽神社》及 《福間海岸》，周邊大自然景色一流，絕對係放假休息好選擇。
當日小編係博多食完早餐，取車後直接自駕去福津市，車程約50分鐘就到著名景點《宮地嶽神社》，而《宮地嶽神社》最著名嘅係每年二月同十月嘅「光之道」， 太陽日落光直照神社形成通往光之大道，屬於日本絕景之一。 大家可以選擇呢段時間嚟旅遊。而《宮地嶽神社》 旁有少量山徑， 喜歡嘅朋友可以嚟個輕行山。
去完神社， 約5分鐘車程就黎到《福間海岸》。《福間海岸》擁有超長海岸線，大家可以黎曬太陽同玩水。旁邊亦有海量Cafe俾大家打卡Chill吓。 而當晚小編入住嘅營地GLAMP DOME FUKUOKA FUKUTSU就係位於海岸線旁邊，非常方便。
GLAMP DOME FUKUOKA FUKUTSU設有16個海邊帳篷，可觀賞海景，設施亦非常齊全。
每個帳篷都有齊冷暖氣，空氣清新機等⋯⋯旁邊獨立小木屋屬於用餐區，擁有獨立洗手間及浸浴設施，更有私人桑拿房可供預訂選擇。營地按人頭收費，價格已包: 早晚餐、飲品/啤酒任飲、雪糕任食、工作坊體驗(人頭計)、蔬菜吧、滴漏咖啡豆等⋯⋯亦有免費單車及小遊戲提供，非常適合一家大細讓大家可以休閒度假。
小編好喜歡工作坊體驗，我哋選擇左DIY Pizza同埋煙燻小食。全程都有工作人員同我哋一齊製作食物，見到成品之後真係非常有滿足感！ 營地仲有啤酒任飲，真係好鬼爽。
神
社
宮地嶽神社
玩完一輪， 係時候入房休息一下！與此同時，營地職員會為大家準備晚餐，將日本新鮮BBQ食材送到小木屋。 套餐包括時令海鮮、 日式雞鍋、 韓式烤豬肉等⋯⋯最特別嘅有日本牛脷。係小木屋內， 嘆住冷氣慢慢烤美食，傾吓偈，真係旅行嘅一大樂事。
一場嚟到日本，盛夏梗係要玩煙花啦！ 煙花可直接係營地購買，如果有興趣亦可以買柴玩campfire。當日我哋就選擇左玩煙花，真係好靚。
最後望住星星浸浴充電，聽住大自然聲音瞓覺，好開心咁過咗一個晚上。
總結:
福岡福津市整體感覺非常放鬆，景點地方大，亦都好休閒，同一地方可以接觸到山同海。
晚上住嘅營地GLAMP DOME FUKUOKA FUKUTSU 非常舒適，食物美味，仲提供唔同玩樂設施，非常滿意。最重要環境一流，仲可以望住個海，真係好Relax，好適合嚟充電渡假，放鬆一下。
營地篇介紹暫時到呢度，下一篇小編將會同大家分享福岡市附近推介嘅戶外及露營店鋪， 記得密切留意。
想預訂日本豪華露營，可直接到Resort Glamping了解更多