踏入2024年！HKCAMP小編繼續走訪香港唔同嘅露營場地， 依家Campers要求越來越高， 講真剩係得一片草地嘅露營場已經唔夠驚喜! 最近探訪元朗新田一個私人場地《奇異農夫》， 除咗綠悠悠草地俾大家感受露營樂趣之外，更有多元化體驗; 現摘超甜士多啤梨、 新鮮蔬菜即採即野炊等等。最令人驚喜重點係園地佔地100萬尺，大家想點行點Hea都得！
位於元朗新田嘅全新露營場地《奇異農夫》佔地100萬尺，絕對係一大亮點! 園區係2024年1月正式向外開放，小編好高興可以到新場地觀摩觀摩，一齊同大家睇睇100萬尺園區有幾震撼啦! GoGoGo！鍾意睇更多露營資訊，記得俾個like我哋IG或者Facebook！
露營及漁農創科基地
《奇異農夫》又名香港漁農科技中心，顧名思義係以漁農科技為主題，透過向大眾提供多元體驗，包括露營，親子玩樂遊戲等，讓不同年齡嘅學生及家長可以學習生態科技，園區同時與香港唔同大學合作，成為本港大學嘅科研基地!
交通便利
營地位置係青山公路米埔段，小編直接從沙田駕車入去，全程都只係需要25分鐘. 如果乘搭交通工具，可以於上水新發街或於元朗水車館街搭17號小巴，直到米埔隴村落車，車程大約15分鐘，交通便利!
多元活動 露營及活動區域畫分清晰
園區分為唔同活動區域，畫分非常清晰! 兩片綠悠悠嘅草地就係露營區，對著兩個景色優美嘅漁池! 環境悠靜，岩哂鍾意靜靜甘享受露營嘅朋友.
露營區附近設有設施齊備，整潔嘅洗手間及淋浴間. 除此之外，仲有共享廚房及雪櫃提供!
園區更提供露營用品租用服務，而且用具會定時消毒清潔，確保衛生，大家有需要都可以預先同場地預訂!
多項體驗活動 大人細路都岩玩
有別於一般露營場地，《奇異農夫》設有多個體驗區, 讓大家可以免費參觀及親身試試唔同類型活動! 當中包括魚塘養殖區、螢火蟲及夜行生物養殖區、智能溫室、環保科技域、廚餘回收區、魚苗大學科研中心等等.
露營黎講食物都係重要環節之一! 露營區對住嘅漁池, 大家可以參加橫水渡捕魚, 捕蝦體驗, 捕捉到嘅魚同蝦, 可以一邊露營一邊享用!
園區內嘅智能溫室更種植多款時令蔬果水果, 士多啤梨, 車厘茄, 蕃茄及各種蔬菜等等, 即摘即食特別有風味!
唔想煮? 園區仲有正宗傳統圍村盆菜, 各類煲仔菜提供, 讓大家體驗不一樣嘅露營樂趣!
如果鍾意大自然嘅朋友一定唔會失望! 園區位置係米埔自然保護區附近, 有豐富雀鳥及生態資源, 大家可以係園區內觀賞侯鳥. 主理人更表示, 未來數月更會有人工濕地, 到時大家可以親身親親大自然, 認識濕地彈塗魚等! 真係好令人期待呀!
設有不同種類工作坊 樂而忘返
平時去露營, 露得悶悶地仲可以參加園區內嘅珍珠採摘體驗活動, 茶粿及糕點製作工作坊等等. 對農耕體驗有興趣嘅朋友仲可以參與其中! 目前園區已與唔同中小學校合作, 讓學生利用科技收集及了解農耕數據, 從而學以致用.
而且場地更係寵物友善場地, 大家可以帶埋小毛孩一齊親親大自然! 帶小毛孩黎記得要帶好頸帶頸繩及看管好, 以免心愛嘅小毛孩受傷走失呀!
小編總結:
參觀去過香港唔少露營場，空間係好重要。除咗基本大草地外，如果露營場地內有更多設施或者地方可以慢慢走動，享受露營或大自然。
今次探訪《奇異農夫》優點地夠大，當中小編亦都親採摘新鮮蔬果，士多啤梨真係好甜，亦都可以即時野炊享受露營樂趣，場地亦提供唔少活動可以參與，適合一家大細露營玩返兩日一夜。而且露營景色相當遼闊，同埋可以望到魚塘景的確舒服好多，同時亦多個花海可以打卡。
咁當然都有缺點：洗手間淋浴設施略嫌不足，不過因為啱啱開放，會再因應人流而增加。
《奇異農夫》係最新露營好去處, 大家要去就要早啲Book啦!有興趣朋友, 預訂請按此
Text: Ellen@hkcamp Photo: Add@hkcamp movie: sky@hkcamp