開季啦～ 天氣咁舒服梗係去露營，應該有唔少人已經開始咗啦。今年露營嘅熱潮越嚟越濃厚，各個品牌都有唔同嘅露營活動，完全係百花齊放！作為露營媒體嘅HKCAMP喺香港露營文化祭過後，各小編都忙住訪問唔同活動及新場地，其中一日比較特別～就係同各CAMPING達人一齊做咗個圍爐訪問，今次邀請咗唔同CAMPING達人一齊圍爐取暖，吹吓水！ 分享自家裝備同喜好，我哋會分開兩Part介紹。 . 當日仲拍攝咗好多有趣片段，就連HKCAMP谷主都有被採訪，想睇就留意holimood，而HKCAMP就主要訪問大家露營開季嘅裝備， 一齊睇吓佢哋有咩分享？
CARPUS主理人分享 今次嚟到場地Carpus拍攝， 場地位於上水虎地坳村以Car Camp為主，HKCAMP亦都有同佢哋合作過，係一個唔錯嘅地方。今次就搵咗兩位主理人Kobe & Ronan傾吓計，分享最愛露營裝備。
訪問中小編問到有咩露營裝備可以同大家分享吓？ 兩人不約而同咁講「車」就係佢哋最重要嘅露營裝備，幾位主理人其實都係愛車之人，所以車絕對係佢哋嘅最愛裝備，亦都因為呢個熱情所以佢哋開咗Carpus，比揸車嘅人士有更好嘅露營環境， 加上私心等自己同朋友都有個地方可以隨時露營。
期間佢哋仲透露咗，早排用咗好多心機將一㗎舊版Jimny裝上車頂營比大家試，就係上圖紅色呢架啦！ 好有Vintage嘅味道，如果想試吓佢哋最新嘅車頂營，可以搵佢哋問問，感受下佢哋嘅心機，打卡都唔錯。
講完車，小編就叫佢哋開啲露營裝備嚟睇吓啦！當中小編發現有唔少咖啡用具，的確對好多人嚟講去露營點都要嘆杯咖啡， 因為時間許可亦都可以即時磨豆， 相比起平時繁忙嘅感覺樂得輕鬆， 有時去露營就係想放空舒緩一下緊張嘅生活情緒， 感受大自然嘅美好。 其實Carpus兩子大部份裝備都同大家差唔多， 例如DOD帳篷、木製營枱都係類似嘅嘢，因為以Car Camping為主，所以重啲都唔緊要，最重要係車嘅容量同埋夠唔夠型 (笑～) 同佢哋傾偈離唔開都係講《車》， 所以愛車嘅人士可以到Carpus感受一下佢哋對車嘅執着同熱情，仲有原來Carpus都有一啲自家製嘅產品， 入嚟露營嘅時候不妨買啲紀念品做手信，當中汽車香薰牌最愛歡迎。
車中泊CAMPING BoBo分享
自從HKCAM香港露營文化祭後都未有機會再同BoBo傾偈， BoBo可以話係車中泊露營界嘅KOL，仲有佢囡囡真係好可愛， 除咗架靚車之外，今次藉住呢個機會要問問BoBo有咩露營裝備分享先？
車中泊係佢嘅主場場所以都要講吓車中泊先，關於車中泊所有裝備，其實都係經過自己裝嵌及改良先達到現時嘅效果， 好多時候佢會睇住YouTube一邊睇一邊整， 用落嘅時候又會發現某啲位需要再改良，仲要顧及囡囡嘅需要， 所以Bobo嘅裝備其中之一就係自己製作嘅車內裝置。
小編真心佩服可以將一架車變成一間屋，由水源、雪櫃至微波爐都齊晒， 完全可以解決香港住屋嘅問題 (笑～)， 希望下年香港露營文化祭會有更多車中泊展示比大家睇睇。
小編問BoBo仲有咩好物分享？ 眾所周知佢最鍾意就係露營煮美食，仲要成日煮好靚嘅牛扒， 當日Bobo就帶咗一個小烤爐到場烤牛扒俾大家試試，呢個新玩意好似好有趣！ 呢個原來係NuBroiler高温牛扒烤爐，佢可以高溫用短時間烤牛扒， 只要用一罐Gas就可以達到800度高溫，而且因為高溫，所以可以做到外脆內軟嘅效果鎖住肉汁， 小編睇住成個過程非常簡單而且個爐真係好細，好適合Car camping人士， 試食嘅時候真係覺得好正。 對於好多人嚟講露營必須食，係戶外煮美食係必須，煮完又可以同朋友分享再飲杯就過一個camping holiday，唔知大家認唔認同呢？
Part 1暫時分享住咁多先，Part 2會有柴火野炊達人David @ D&E Outdoor同小朱EE @ runningbabywild 同大家分享唔同裝備，另外最近我哋都去咗好多唔同嘅場地，會有影片可以訂閱定我哋YouTube。
約定大家, 我地營地相遇~
編: Sky
設計: Add
**以後關於露營圖片及分享，記得打Hash Tag（#HKHKCAMP）