首先要多謝小水滴 x Sttoke邀請，於8月14日(日) 進行左一個非常有意義嘅淨灘活動， 雖然今次小編因有工作在身未能成行， 但呢啲咁有意義嘅事梗係要報道，下次記得再叫我哋，淨灘清徑呢類型活動HKCAMP各同事一向身心力行，支持到底！
過往有唔少自願團體都會義務執垃圾，今次就要介紹下「小水滴Drip」，佢哋會透過每月清潔沙灘活動為環保出力，「小水滴Drip」希望透過身體力行讓大眾明白要愛護環境、減少及妥善處理廢物，希望每個人都願意踏出一小步，終有一日美麗嘅景色會再現係大家眼前。 今次淨灘活動仲有STTOKE，STTOKE一直以嚟參與推動環保，更希望走多一步，令減廢走塑由一個可重用嘅咖啡杯開始，由於雙方理念相同， 一拍即合舉行呢個淨灘活動，非常值得支持！
南丫島石排灣淨灘，垃圾量驚人
今次活動地點選擇南丫島石排灣，離遠睇係一個自然又靚、水清沙幼嘅沙灘，上岸發現有無數魚網、膠瓶、吸管、口罩甚至發泡膠等垃圾。今次一行30幾位大小義工努力咗一日，都只係可以清到少部份垃圾，未被清嘅好大機會再流入海洋影響生態。 所以無論點樣我哋都要一齊合力改變，盡量使用可重用物品減少浪費，去戶外活動嘅時候記得自己垃圾自己帶走，同時向著小水滴同Sttoke嘅理念「愛承擔，樂助人！不因力少而不為！」一人一小步，一定可以做就更好嘅環境。
再次感謝一直為環保出力嘅義工， 喺炎炎夏日仍然堅持淨灘，小編都參與過唔少淨灘清徑活動，天氣熱時身體的確係有啲辛苦，多謝一直堅持嘅義工們，HKCAMP為你哋感到驕傲。
又要講多次，無論係露營、行山或者任何戶外活動，記得自己垃圾自己帶走啦～ 想睇睇佢哋新動向，可以按下面Link
約定大家，我哋營地再遇！
相片及資料來源：小水滴 & Sttoke
**以後關於露營圖片及分享，記得打Hash Tag（#HKHKCAMP）