日本露營文化已經發展得非常成熟，小編回想當年到日本營區露營，真係非常正。如果日本正式開關，老老實實真係超想飛去露一露。
今年4月，日本高知縣地方政府第二個主題公園，結集吃，玩，住於一身嘅“LOGOS Park Seaside Kochi Susaki”正式開幕。如果開關之後再飛日本， 不妨抽幾日去露兩手， 感受日本不一樣嘅「旅營」風格。
LOGOS首個高標準露營主題樂園
LOGOS最鮮為人知嘅產品應該係佢個Mestin。 今次佢踩過界，連同日本高知縣須崎市合作，首辦以露營為主題嘅露營公園”LOGOS PARK SEASIDE KOCHI SUSAKI”。一眾日本營友有福啦，可以與家人朋友一齊係海灘上燒烤、露營、玩樂，真係諗起都極葡萄。香港嘅Fans唯有寄望快啲開關啦。
以「戶外、吃、玩、住」為理念 坐落於絕佳海景位置
LOGOS Park擁有極佳地理位置，營友可以一邊與家人朋友享受海景，欣賞須崎市嘅魅力， 一邊享受烹飪、燒烤嘅樂趣， 仲有各種各樣活動及工作坊。
主題樂園坐擁超壯觀海景，大家可以入住 19 個露營地以及 4 個集裝箱房屋。無論大家係露營新手，還是一家大細，都非常適合。主題樂園內設施充足，熱水，小廚房，多功能廁所一應俱全。大家係海景及大自然之中享受燒烤及露營樂趣，而且營地兩側可以停車，即使落雨都無有怕。
19個獨立露營地
每個露營地都配備熱水、小廚房、電源及停車位。仲提供全套帳篷及烤架比大家租用，兩手Fing Fing、都可以入黎享受一下。
車Camp露營地
除咗有獨立露營地，駕車朋友仲可入住車Camp區， 一個車Camp區可以容納最多6個人， 啱哂小家庭。仲提供防水幕，帳篷及電源。
集裝箱房屋區
主題樂園內有4棟裝箱房屋，全部都設備齊全，除咗配備冷氣，淋浴間，雪櫃外， 仲有 Wi-Fi，而且每棟裝飾都各有特色。外邊仲有熱水小廚房及露台， 方便大家燒烤。
貼心提供訂餐服務 啱哂即興朋友仔
入住嘅客人除咗自備食材外，仲可以訂餐，租用烤架。 即使咩都無準備都可以入黎玩返晚。主題樂園提供有無限暢飲嘅"食材隨身套餐"及"高知須崎套餐"，入住嘅營友可以係樂園內享受當地燒烤。唔過夜，入黎玩日營都一樣正。
仲有打卡必到LOGOS CAFE
主題樂園內仲有高知縣首家LOGOS直營店Logos Cafe，鍾意打卡嘅朋友真係唔可以放過好機會。LOGOS Cafe主打“楓軟”甜點，仲有便餐及原創混合咖啡。大家不妨租把太陽傘，休閒座椅，係樂園內散步野餐，真係諗到都夠Chill! 店內仲有“LOGOS LAND”中人氣糖果店“Enjoi Honpo”，大人細路都Like爆。
推介多項休閒共享設施
主題樂園內設有唔同休閒設施比大家Hea一Hea。深受小朋友歡迎嘅楓葉廣場（玩具公園）提供多個玩具套裝比小朋友動動腦根，仲有“LOGOS LAND”中流行嘅蓬鬆圓頂，椅子及長凳，大人可以一邊休息，一邊陪住小朋友玩。大家仲可以係一大片綠油油嘅草地上鋪上吊床，邊Chill邊野餐。
主題樂園屬於禁止游泳嘅區域，所以附近環境都好清靜，仲好有私隱度，帶埋小朋友黎個下水禮，真係超興奮。
開設多個工作坊配合大家需要
想靜靜地感受一下，可以參加神社參拜課程。係浦之內灣，有市政遊輪前往菅崎市嘅標誌神社。神社具有獨特嘅出海方式，回程仲可以慢慢散步到 Logos 公園，係咪夠哂Relax先!
鍾意睇星星嘅朋友，樂園內仲有天文望遠鏡，大家可以租用望遠鏡欣賞須崎美麗嘅星空。
溫泉是重點必到Check Point
係日本當然唔少得浸溫泉，「旅營」都一樣可以嘆下。樂園附近有歷史悠久嘅宗田山溫泉，桑田山腳下有礦物質離子溫泉，都係屬於最高溫泉水量及優良嘅溫泉，一場黎到當然唔可以錯過。大家可以享受露天浴池以及室內浴池等，真真正正放鬆身心。 Logos Park酒店仲可以為大家提供免費浴巾租賃服務呀，夠哂貼心。
玩埋最激水上活動
有靜當然有動啦! 係Logos Park，大家可以遊走於氣勢磅礡嘅大島間。樂園附近有獨木舟場，大家可以體驗海上皮划艇及SUP（計劃全年開放）等活動。夏天嘅時候真係透心涼呀。
睇完日本Logos Park， 大家有冇心心眼呢。希望快快開關，大家可以露出香港，一齊享受一個超正嘅「旅營」啦!
約定大家，我哋營地相遇!
*相片及資料來源: LOGOS
**以後關於露營圖片及分享，記得打Hash Tag（#HKHKCAMP）