top of page
  • 作家相片HKCAMP

銅鑼灣超靚露營燒肉餐廳出沒注意・由熱愛露營嘅Campers開設・美食打卡一次過滿足晒大家!

已更新:2023年7月4日

夏天天氣咁熱,真係冇辦法去露營!一個熱愛露營嘅Campers,懷着一顆愛露營嘅心, 花盡心思喺銅鑼灣開咗呢間露營燒肉餐廳《露營生活》。餐廳內每個角落都滿佈露營特色,係店內更會發現佢哋嘅露營用品珍藏,因為老闆想將露營變成自已生活一部份。無論喜唔喜歡露營嘅你,都要黎朝吓聖,親身感受露營氣氛及享受高質美食。


平時熱愛露營嘅營友一到星期六、日就會出動「露」兩手, 燒肉店老闆亦都唔例外!除咗鐘意露營,佢都係野炊高手,鍾意同朋友一齊野炊再飲飲清酒。 係機緣巧合之下,老闆開咗呢間露營主題燒肉店。

露營主題? 小編當然要去參觀一下啦!餐廳位置非常方便,位於銅鑼灣黃金廣場4樓,放工約朋友堅方便,以後無時間露營,都有多個地方選擇。

*大家可以先睇睇我哋嘅YouTube片,溫馨提示!肚餓慎入!





 

花盡心思將露營融入餐廳及生活


一入餐廳大家會發現每一個角落都擺放住唔同嘅露營用品。細心觀察下,睇得出呢位Campers老闆嘅喜好同品味, 每一件露營用品都係精心挑選,將露營風格及品味融入餐廳。


餐廳內滿滿小心思, 令小編非常驚喜嘅其中一個設計,就係燒肉枱櫈高度完全跟平時露營嘅枱櫈高度一樣,因為老闆希望每個食客坐低享受美食都有露營嘅感覺,所以花咗好多時間去設計訂造,無論係外觀、感受都有濃濃露營風味。


店內空間感十足,絕無擠迫感。老闆認為大家去露營就係想Chill住享受食物同埋同朋友傾偈,如果枱與枱之間好接近,就失去露營Feel。

餐廳內滿滿都是露營用品, 全部都係精挑細選



呢個display應該係個人珍藏?



 

味道質素高・必試日本和牛


介紹食物之前,不如打個卡先! 係室內坐露營枱櫈食燒肉,小編都係第一次。而且佢哋嘅燒肉枱係六角形設計,感覺好有圍爐Feel!餐具全部都係露營杯同埋露營碗,每張枱更掛上一支露營燈,堅係有露營Feel,好正!同朋友一齊嚟食飯傾偈就啱哂!


至於食物種類亦都非常多,有燒肉套餐,亦有單點精選。 如果唔食燒肉亦有日式串燒等等選擇。 一場嚟到,小編梗係要試一試佢哋嘅燒肉啦!


燒烤套餐包括雞扒魷魚等等⋯⋯另外單點必試日本和牛。 整體食物質素非常高,推介日本和牛,每一個部位都有唔同嘅味道。當中特上牛小排及牛腹腩,牛味非常濃郁,入口即溶,真係唔夠喉 (笑),食完仲想一食再食,真心推介比喜歡牛味濃嘅朋友。


喜歡和牛牛脂味嘅朋友就一定要試牛三角、 肩胛及牛肋條。 呢幾款和牛油脂比例豐富,入口溶化,牛脂香味滿佈口腔,令人回味無窮。再飲多啖啤酒,簡直係「爽」。


而其他食物例如雞扒、魷魚,味道亦都非常不錯。一場嚟到,環境又甘舒服,當然要同朋友慢慢分享。如果帶小朋友嚟,餐廳亦設有小朋友露營櫈及兒童餐點提供,大人細路都照顧周到。

燒肉點少得和牛, 睇見都流晒口水!


露營餐具真係好有Feel!

餐廳燒肉枱通風系統非常好,有別於一般燒肉餐廳。食完唔怕會有氣味,女士們至愛!


 

餐廳滿佈打卡位・更有戶外用餐區


不得不提餐廳設有戶外用餐區,更定時有現場音樂表演。戶外用餐區之後更會設置露營帳篷,露營Feel Up。


餐廳除咗美食之外,處處滿佈打卡位,勁IGable。 當日吸引小編嘅除咗整間餐廳嘅露營用品設置外,月球牆都非常吸睛,小編要自肥放上IG啦!

餐廳裝修用上不同木元素, 有質感同時非常有格調。

另一邊有日式主題高枱, 配上高腳露營櫈。 唔食燒肉嘅朋友,可以飲飲日本酒、嘆下串燒。


擺酒嘅地方都暗藏露營元素,正!

餐廳更會不斷加入吾同露營元素,戶外位置天氣涼啲仲會搭建帳篷,大家黎到又多個打卡位啦!


現場音樂表演,依家唔使去酒吧,黎露營燒肉都可以享受到, 勁Chill!


 

整體而言食物及環境質素都非常高。 餐廳每個角落滿佈老闆喜歡露營嘅心思,處處顯露出佢對露營嘅執着同熱愛。 無論大家係咪露營愛好者,都推介大家嚟感受一下。


未去過露營嘅朋友,小編相信去完呢間餐廳之後,都會令大家踏出第一步嘗試露營野炊樂趣。 《露營生活》絕對係一間高質餐廳,有時間去開銅鑼灣,一定要試試。



《露營生活》

地址:   銅鑼灣黃金廣場4樓全層
訂位:      (852)2353 5068
WhatsApp: (852)5923 8263

手機號碼# 59238263

編/ SKY@HKCAMP 拍攝/ ADD@HKCAMP



bottom of page