小編日本露營遊記・露到京都DOD Camp Park (附訂位教學)
- HKCAMP
- 2023年12月4日
- 讀畢需時 6 分鐘
已更新：2023年12月6日
營友愛露營, 去過哂香港嘅營地, 唔再滿足到大家? 不如今次我哋露出香港, 去到近期討論度極高嘅超人氣Camp site, 位於京都嘅DOD Camp Park (DCPK), 同大家一齊實地Unbox! Go Go Go!!
小編終於親身去到京都嘅DOD營地， 帶住興奮嘅心情喺大阪自駕遊到京都南丹市，沿途有啲山路但好有驚喜，因為見到唔少紅葉， 不過當日美中不足嘅係，去到營地夜晚開始落大雨，直到第二朝先停雨，有啲掃興。但總算體驗過整個DOD Camp Park， 亦都可以喺度同大家分享需要注意嘅地方，大家睇落去啦。
小編好開心到DOD，要即刻打打卡
營地很大，被山包圍好寧靜舒服
當日小編入住A-8營位 *圖片來源: DOD Camp Park Kyoto
自駕從大阪出發・享受紅葉美景
日本露營比小編感覺係同大自然融合, 非常寧靜放鬆. 小編到日本旅遊平時都鍾意自駕遊, 所以今次都會自已開車入營地. 從大阪市駕車到營地, 成個行程大約2小時.
因為係十一月中旬嘅關係, 沿途駕車穿梭山林之間, 偶然會見到紅葉, 如果係十一月尾去相信可以睇到成個山頭紅葉嘅壯觀景象!
兩手Fing Fing去露營每人12,500円
到達營地泊好車之後, 就可以到營地接待處報到. 小編預訂咗Glamping一泊兩食, 包風呂Package。到著報到之後, 就有專人幫大家執好哂所以露營gear及食物, 仲有一位會講英文嘅工作人員帶大家到預約嘅營位, 全程體驗到日本人嘅細心同照顧周到!
Check in後會比一架露營卡車， 入邊有齊晒唔同嘅Gear，之後就出發去自己嘅營位。成個營地劃分唔同區域，有自扎營區及Glamping區，Glamping區內有唔同營帳大細選擇.，小編當日入住嘅係3-4 人營，營區內更可以欣賞到河景及山景，配合紅葉真係超有Feel！
價錢: 三人營位 ＋ 一泊兩食 ＋ 溫泉入場券總共: 37,500円
享受真日本野炊樂趣
大約5:00開始天黑, 天氣明顯凍咗。營地安排工作人員為大家起營火, 暖笠笠嘅小編都開始要準備野炊啦! 煮食用具及餐具都係DOD Signature gear, 打卡超滿足!
餐膳方面都絕對唔會Hea大家，大約6:30 職員會將新鮮食物送到，主食以BBQ及火鍋為主, 預訂前有三款套餐比大家選擇。天氣咁凍嘆和牛火鍋真係暖入心，好好味。仲有超大棉花糖，啖啖都係日本露營風味！
天然溫泉・儀式感UpUpUp!
小編對柴火情有所鍾, 係香港要玩柴火有啲難道! 不過係日本就可以玩到香港營地玩唔到嘅正野! 除咗可以劈柴生火之外, 仲可以玩埋極少女心嘅仙女棒. 一場黎到, 唔係唔玩嗎?!
玩完仙女棒, 係時間入鄉隨俗嘆返個風呂啦!
營地內有天然溫泉, 大家可以享受100%源水嘅露天浴池、室內浴池、岩盆浴及樓流桑拿. 大家可自備毛巾, 或者好似小編咁到場地租用. 不過提提大家, 日本大部份風呂都唔比有紋身嘅朋友進入, DOD營區內風呂都係一樣, 所以建議大家出發到風呂前都要留意!
*由於溫泉吾可以影相，所以用返官方圖片
圖片來源: DOD Camp Park Kyoto
圖片來源: DOD Camp Park Kyoto
場內仲設有室內溫水泳池、按摩池及嬉水泡泡池, 都係全年開放, 無論大家咩季節黎到, 都可以放鬆身心!
圖片來源: DOD Camp Park Kyoto
冬季露營 保暖好重要
冬季露營, 特別係日本日夜溫差較大, 小編會係入帳篷休息前先開定暖氣, 到入營帳內休息已經暖笠笠。營地除咗有暖包暖貼提供外, 更有暖水袋提供比有需要嘅朋友, 不過數量有限, 有需要可以早少少同營地拎定啦!
但由於溫泉後落大雨，所以小編晚上嘅活動都停止，早啲瞓啦。
露營早上嘆返個早晨全餐, 是常識吧！DOD Camp Park一泊兩食包咗早餐，有齊咖啡、水果、三文治。三文治上印有DOD 兔仔Logo，一場黎到一定要打打卡！
嘆完早餐，就要開始執拾行裝。所有用過嘅Gear，餐具只需要放係度就有專人負責收理，大家只需要將營燈，Speaker等物品送回接待處就可以, 認真周到。
最後11點check out，就係咁完結左小編京都DOD Camp Park嘅露營之旅， 希望下次去係陽光普照啦。
小編分享訂位教學， 用心分享記得比個Like
小編係經日本營地網站訂位， 過程唔算難。當然整個網站全日文，大家可以用翻譯譯返中文慢慢輸入資料，跟步驟一步一步填就可以做到。 如果唔想煩可以搵專注日本營地嘅RTG Travel 佢哋有專人喺日本代訂露營車及露營場。
1. 先撳以下連結進入網站，Click入預約，並選擇日子
2. 記得揀3L或3M先係包埋帳篷同埋露營用品，圖中9000円貴啲嘅係包早餐及晚餐，4000円就只租營位。
3. 按預約後，必須選擇人數及到達時間。一路落到最底會見到總價錢，之後撳藍色掣預約。
4. 由於你未成為會員，所以會跳到呢個頁面。 我哋chick紅色箭嘴會員登陸，就可預訂營位。
5. 空白位置直接輸入電郵， 輸入後你會收到一個電郵。
再撳電郵內的連結登陸會員。
6. 第一第二行係設定你嘅密碼， 第三行係稱呼， 之後√下面兩項綠色細則。
7. 呢一Part比較複雜， 必須輸入日文名嘅片假名， 大家可以直接按此輸入中文名轉為日文之後copy and paste落去。地址同電話小編輸入咗前三日入住嘅大阪酒店地址及電話，方便聯絡。
入完資料落到最底，有一個位置必須填寫，之後選擇現場付款，最後確認。
8. 恭喜你！最難嘅部份已經完成！你會見到呢個畫面。如果去唔到代表你有資料填錯咗，可以睇返以上第7步。
之後呢一頁代表需要確認資料，你必須再重複睇睇，入營日子訂購嘅項目及價錢，作最後確認。之後就完成整個訂位程序啦！
9. 確認完成！訂單會有訂單編號，收到確認電郵，代表你已經順利預訂DOD Camp Park營位。 入營地時需要Show返呢個預約編號比工作人員就可以。
(*圖中是小編2022訂購營地嘅電郵通知，俾大家參考 )
雖然預訂時唔使俾錢，但千祈唔好NO SHOW，做個負責任嘅遊客。如果有任何情況導致未能到達營地，請務必通知對方， 因為工作人員會好擔心你嘅安危。
免費接駁巴士到營 貼心又方便
如果唔選擇自駕, 營地都設有免費接駁巴士接送大家. 大家只需要坐JR, 到達JR 嵯峨野線「園部站」, 13:10 會有從JR嵯峨野線「園部站」西口出發嘅接駁巴士接送大家到營地. 離開營地時, 都可以於12:40 從DOD Camp Park出發到JR站, 非常方便貼心!
小編總結?!
總括今次DOD Camp Park體驗係舒服同埋值得去嘅! 價錢方面, 兩手Fing Fing Glamping Package, 包晚餐及早餐, 預計大約每人1千, 食物質素唔錯, 而且有齊所需gear及風呂體驗, 呢個價錢可以講係非常合理.
如果大家到大阪旅行, 想體驗係日本Camping，但又唔想甘Hard core帶哂裝備嘅話, 不妨搵1-2日時間去試試DOD Camp Park嘅Glamping體驗. 走嘅時候仲可以去埋京都, 真心推介!
DOD Camping Park Kyoto
地點: 〒629-0335京都府南丹市日吉町中宮ノ向8番地
電話: 0771-72-1526
開放時間: 10:00 - 21:00 / 休館日: 10:00〜18:00
*相片及資料來源: HKCAMP / DOD Camp Park Kyoto
** 以後關於露營圖片及分享，記得打Hash Tag #HKHKCAMP
*想睇我哋日本Trip發現咗咩正嘢, 好物, 靚營地? 快d㩒入HKCAMP YouTube Channel及相關Post睇重溫啦!YouTube更多日本營地推介按此
開季啦! 一文睇哂！2023香港私人露營場地總覽｜內付地圖比你慢慢睇~ 請按此!
露營想拍下開心回憶, 一部全方位又輕巧嘅相機一定要有!
Comments