top of page
  • 作家相片HKCAMP

我要去日本露營! 私心推介免預約Walk-In露營場地! Part I

小編經常收到營友私訊, 分享佢地係日本露營嘅靚相, 有時仲會問小編日本邊個露營場地正, 或者有邊個露營場地可以Walk-In, 唔需要預約!


係日本景色甘靚嘅地區, 遇正露營旺季, 露營場地一般三個月前就會爆滿. 不過預約唔到都唔需要失望, 事關有部份露營場係可以Walk-In, 只要大家想露, 總係可以露!


小編係網上搵到日本各地可接受Walk-In嘅露營場地, 一連兩集同大家做定功課! 有部份露營場更加有風呂, 真係睇見個心都暖哂!


【宮城縣】吹上高原露營場

吹上高原露營場地位於宮城縣北部海拔300米高地,係一個免費嘅草坪場地,車輛可以係草坪上行駛,設有寵物及可預約含電源位置嘅營位,最多可以容納400個營帳.




營地被群山包圍, 唔同季節都可以欣賞到日本唔同嘅大自然靚景. 冬季係滑雪勝地, 夏季可以玩滑翔傘、高爾夫球及釣魚.


位於溫泉之鄉, 附近有溫泉鬼部之湯, 大家可以享受各種類型露天浴池及室內浴池, 包括木浴池、石浴池及磚浴池. 另外仲有木棧道, 手工啤酒館. 如果遇岩時間, 仲可以見到山羊呀!




無Gear唔洗驚啦! 大家可以預早同露營場預訂露營用品,包括營帳,睡袋,露營燈等. 此外,營地更有燒烤設備及食材提供, 心血來潮想露一露都超級方便!


【宮城縣】吹上高原露營場 Fukiage Kogen Campground

地點: 〒989-6941 日本宫城县大崎市鸣子温泉鬼首本宫原23-89

交通:

自駕: 從東北自動車道古川 IC 出發,開車約 50 分鐘

公共交通工具: 乘坐市營巴士, 到達鳴子温泉站大約35 分鐘車程, 再轉乘鬼首線嘅田野原巴士, 係吹上高原露營場站落車. 巴士時間表詳情 (平日, 星期六/日及節日)

營地登記入住時間: 早上9點

營地開放季節: 4月下旬 - 11月上旬


 

【長野縣】阿南溫泉Kajika之湯露營地

阿南溫泉Kajika之湯露營地位於被中央阿爾卑斯山包圍嘅山脈之中,露營場地旁邊有一條清澈嘅小溪 - 門原川. 大家沿住小溪就可以漫步到達露營場地.










露營場係免費營地, 唔需要預約. 不過要注意場地內不設露營裝備租借, 大家如果想去就要預備定Gear啦! 另外, 每年冬季 12月中旬至2月下旬, 由於河水結冰, 露營場地會有機會關閉,去之前建議先向營地了解一下.




唔想露營, 仲可以選擇入住附近嘅小木屋. 小木屋係複式平房式小屋, 設有溫泉浴池, 設施及用品齊全, 大家只需準備好生活用品就可以入住. 入住河鹿莊小屋仲可以去埋「河鹿之湯」浸溫泉.


除此之外, 營地附近有縣內最大嘅公共浴池, 露天浴池, 溫泉浴池, 壓力池及三溫暖. 大家可以係溪邊一邊浸浴, 一邊享受天然白噪音及星空, 真係唸起都Chill正!



【長野縣】阿南溫泉Kajika之湯露營地

地點: 阿南溫泉河鹿之湯〒399-15054923長野縣下伊那郡

交通:

自駕: 從Sanen Nanshin高速公路天龍峽IC沿著國道151號線朝豐橋方向行駛約20分鐘

公共交通工具: JR東京→中央線→岡谷→飯田線→安田名古屋→東海道線→豐橋→飯田線→安田. 從 JR 大田站, 搭乘的士約 15 分鐘到達

電話:0260-22-2000

資料及圖片來源: 阿南溫泉



 

【神奈川縣】青根露營地

綠之渡假村、青根露營場位於神奈川縣嘅西北部, 四周圍被清澈嘅清流── 道志川圍繞. 係呢度大家可以欣賞到一年四季被群山環繞嘅靚景. 無論係露營、行山、BBQ、遊河、或者釣魚都非常舒服.



園區內設有小木屋及露營區. 露營區係無須預約嘅免費營地, 可以提供100個可供泊車嘅營位. 無帶Gear都可以即場租借, 非常方便. 玩到攰可以行到附近嘅溫泉區享受由木及岩石製成嘅露天浴池.


值得一提係, 露營場地上游係多西水壩, 大雨水壩洩水時, 警報器就會響起. 大家聽到警報器或巡邏車發出警告,就要立即從河岸轉移去安全位置啦.



【神奈川縣】青根露營地

地點: 神奈川縣相模原市綠區青根807

交通:

自駕: 於相模原 IC 沿著津久井廣域道路 - 縣道 513 號線直行; 從長岳三岔路口右轉進入國道 412 號線; 於青山十字路口左轉進入國道 413 號線(道志道), 往道志方向行駛, 係縣道76號線入口處右轉就會見到營地門牌, 係奧相模湖十字路口右轉下坡, 約 20 分鐘車程

公共交通工具:

從 JR 中央本線藤野站搭乘開往「山並溫泉」嘅巴士15分鐘,係「山並溫泉」落車

JR 橫濱線、京王相模原線「橋本站」搭乘開往三香城嘅巴士30分鐘,然後搭乘前往東野嘅巴士35分鐘,從終點站步行20分鐘

電話:042-787-1380


 

** 以後關於露營圖片及分享,記得打Hash Tag #HKHKCAMP




*想睇我哋日本Trip發現咗咩正嘢, 好物, 靚營地? 快d㩒入HKCAMP YouTube Channel及相關Post睇重溫啦!YouTube更多日本營地推介按此


開季啦! 一文睇哂!2023香港私人露營場地總覽|內付地圖比你慢慢睇~ 請按此!


露營想拍下開心回憶, 一部全方位又輕巧嘅相機一定要有!

bottom of page