早排HKCAMP收到邀請去咗台灣，終於終於有機會親身感受台灣露營場地，仲一次過嘗試自駕遊及車中泊，遊走南投及墾丁一轉。終於整理好哂相片同影片，要好好記抵今次台灣露營遊記，同分享一吓今次台灣露營嘅小資訊啦。
高雄取車到《蟬就: 溪頭生態露營區》
第一日由香港飛高雄機場，大約一個鐘就到真係好快。未去露營之前HKCAMP小編們就係高雄市內玩咗半日，再好好休息等第二日打大佬，有啲緊張因為第一次台灣自駕，仲要係揸上山露營。
第二日約好《VANTEL美學車中泊》係高雄機場附近取車，與VANTEL團隊一齊出發，自駕2個鐘去溪頭，位於海拔1,150公尺的森林園區內嘅營場《蟬說: 溪頭生態露營區》。第一次台灣自駕，由於左軚關係同台灣路面好多電單車要慢慢揸，大約半個鐘後開始適應，整體台灣揸車唔算困難，最後順利到達營場。
山林內露營・台灣過百年樹木下紮營
到達營地泊好車後，見到一大片森林，環境好正！海拔1,150山上天氣有啲唔穩定，同埋都有啲清涼。先到安排好的位置紮營，再周圍行吓。
係過百年嘅杉樹，好很高！
紮營位置有地台或木台，有啲似荃錦。
營地專用洗手間，須要密碼先可進入，好細心。
如果帶睇片嘅朋友，營地接待處超靚，有共享空間、雪櫃、靚靚淋浴間，女士一定無投訴。
台灣自然保育區生態活動
安頓好之後，我哋參加咗新態導賞團，畢竟呢度係屬於台灣知名保育區，非常難得可以見識到台灣生態環境，包括了解山上森林樹木及昆蟲等等⋯⋯突然天氣開始差起上嚟，陰天有點霧氣。入夜後好多螢火蟲，今次係一個好難忘嘅露營回憶。
山林白噪音睡眠
轉眼間到夜晚，晚上野炊有啲咩？預訂營地時可選購烤盤美食組，亦可租借野炊用具。小編認為講營地安排最適合，畢竟我哋都唔知去邊度買食材，就等營地幫我哋好好安排。而當晚小編就同台灣朋友一齊野炊，享受台灣美食傾吓計，過咗一個好開心嘅晚上。由於在山上冇光害，亦都可以睇到滿天星，好滿足。
周邊景點眾多，建議玩足三日兩夜
溪頭除咗露營，周邊都唔少景點包括: 《溪頭國家森林遊樂區》、《溪頭妖怪村》，由營地出發步行5-15分鐘便可到達。
行山必到《溪頭國家森林遊樂區》
從營地出發約5分鐘便到達，溪頭自然教育園區為一三面環山吧凹谷地形，海拔最高為南面的嶺頭山 2,025m，由多個山項與溪谷流貫兩山脈之間。地方相當大，聽台灣朋友講，如果要行哂須時幾日，內有百年樹木、巨石步道、銀杏步道、空中走廊等⋯⋯不同路線，唔難行新手都希問題，喜歡行山必要一行。
打卡必到《溪頭妖怪村》
從營地出發約15分鐘便到達，溪頭妖怪村絕對係一個打卡景點，以妖怪為名嘅日式小鎮，內有古零精怪嘅妖怪打卡位，仲有多間小店同小食店，記得要到此一遊啦。
總結一下《蟬說: 溪頭生態露營區》
小編第一次嚟到台灣露營，就選擇咗山上嘅《蟬說: 溪頭生態露營區》，車程係有啲遠，但實在係值得。第一次真正森林內露營，啲樹係好高好高，呢個香港真係感受唔到。其次營地內設備齊全，除咗紮營之外亦可以選擇汽車露營、或有冷氣的露營車方案等等⋯⋯而營地有工作人員註場，對於遊客亦更安心。工作人員有善基本上你遇到問題，都好樂意幫忙。營地周邊景點豐富，如果想好好置身大森林過一個假期，近近地一個鐘機程，真心推介。 小編都分享一下要注意嘅地方
交通: 最方便就係自駕遊，如果座公車可選台中出發「溪頭聯營班車」，或好似我哋咁租VANTEL美學車中泊。
垃圾分類: 所有垃圾記得進行分類，營地亦都有充足嘅指示，如果唔識可以問營地職員，保護環境做個有責任嘅遊客。
天氣及氣溫: 由於山上天氣轉變大，就算夏天晚上可能只有十多度，小編有帶睡袋都凍醒，記得帶足夠保溫衣服及穿著防水防風裝束。
最後希望呢個台灣露營遊記幫到想去台灣露營嘅朋友，想睇多啲記得要支持HKCAMP。
Photo & video: Sky@hkcamp
Edit : Ellen@hkcamp
Comments