曾經聽谷友分享，有一次同一個第一次露營嘅朋友上山露營，朋友當時只係帶咗一個極單薄嘅營帳，結果佢朋友凍到一整晚都瞓唔着覺。可想而知一個啱用嘅營帳有幾緊要。
市面上營帳種類繁多，到底有咩選擇嘅準則呢？今日就同大家分享一下選擇營帳嘅基本知識啦～Go！
了解使用者數量 購買適合嘅尺碼
1 .新手購買第一個營帳之前，先要諗下到底營帳有幾多人一齊使用。通常會買一個尺碼比較寬鬆一啲嘅營帳。如果係1人用，買1-2人用會比較舒服: 如2人使用，買2-3人容量最為適當。如果4人用，建議買5-6容量最合適。因為人數越多，除咗休息嘅地方，仲要預留多啲儲存空間。
2. 對於較多人使用嘅帳篷，通常都分開唔同間隔，好似臥室，客廳等。建議購買兩房帳篷或隧道帳篷比較方便。甘就可以將物品行李放係客廳，休息嘅地方就會更寬敞舒服啦。
3. 但對於一個新手黎講，如果要購買一個5-6人用嘅營帳，因為尺寸大，無論係價錢定搭建方面都係一個考慮因素，所以如果真係需要一個大營帳，又唔肯定之後係咪繼續會露營嘅話，給新手建議，第一次露營先租借感受一吓，試完覺得適合先買，市面上有好多租借露營用品公司亦可問問意見，有提供同唔牌比你先租後買，減小浪費。
選擇易於搭建嘅營帳 先建立成功感係好嘅開始
新手係購買營帳之前， 好多時會俾營帳嘅外觀或者品牌吸引，而買咗好難搭建嘅營帳。可能會因為搭建過程困難而對露營卻步，有挫敗感。
建議新手先選擇比較容易搭建嘅營帳。一般來講，俗稱金仔嘅錐形單桿營帳會比較容易搭建。因為只需要喺中心架起一枝桿就可以搭起帳篷。 而另一類比較易起嘅營帳係用兩枝桿搭起嘅圓頂帳篷，都係非常適合露營新手。
先買一個容易搭嘅帳篷，等大家習慣起營過程，有咗成功感，就可以試試挑戰難度高啲嘅帳篷啦。千祈唔好第一步就令自己卻步係最緊要！
選擇耐水壓及防水物料是必然的
買一個營帳，選料都係非常重要，話哂營帳等同一間屋同時須要放置戶外，所以必需要選擇耐水壓防水物料，而耐水壓同防水係非常有關連架，係香港4季天氣都唔算好極端所以比較好選擇，如果在其他國家就更要注意，因落雪等都係考慮因素。
出外露營難免會遇到落雨嘅時候。如果長時間落雨，會導致雨水滲入營帳。 而耐水壓係檢驗織物係耐雨淋嘅指標。 簡單來講，只要耐水壓夠強， 營帳就唔怕因長時間被雨淋而導致雨水滲入，繼而防水性較強。
唔同織物有唔同耐水壓， 一般雨傘耐水壓有500mm左右，雨衣有2000mm左右。而帳篷耐水壓如果係2000mm以上，即使係容易引起暴雨嘅情況，都有足夠保護帳篷內部能力，唔會浸水。不過新手要注意，山區天氣比平坦地形多變化，建議購買至少 1500 mm耐水壓嘅營帳就最適合啦！
營帳高度及抗風結構同樣重要
好多時候選擇營帳，會以高身嘅較受歡迎。因為喺入邊換衫比較舒適。同時呢類營帳都好容易受到強風影響。建議選擇較矮，輪廓圓潤嘅營帳，呢類營帳採用抗風結構設計，強風下都唔怕對框架造成損壞， 會比較耐用，絕對適合露營新手。
營帳係大家嘅顆伴 要珍惜同注重營帳保養
如果帳篷織物被撕裂，雨水，風，昆蟲都會好容易浸入。所以大家每次用完帳篷，都必須要好好涼乾收藏呀。
唔小心整爛營帳？可以用修復材料補修小過1cm都可以用凝膠狀修復，將材料直接塗係小孔上，等凝膠乾就可以封閉小孔，凝膠狀修復材料好處係防水而且唔顯眼，而且乾咗都仍然保持彈性。
但要注意，營帳表面要乾，如果濕咗需要長啲時間先可以乾架。如果超過 1 cm嘅小孔，可以用面積較大嘅修復片修補。好處係可以按小孔嘅大細裁剪到適當嘅size，再貼上小孔上邊。而且有多種顏色選擇。
但如果較大嘅破損，建議都係拎返去營帳品牌進行修補。
露營都係個人興趣。如果大家對營帳未有概念， 建議可以先租用。如果租用到適合再購買。甘樣就可以減少浪費啦。
買啱自己鍾意嘅營帳， 記得要好好珍惜，做好保養呀。咁就可以帶住佢，開開心心去露營啦！
約定大家，我哋營地相遇
相片及資料來源: Google/ Snow Peak IG/
**以後關於露營圖片及分享，記得打Hash Tag（#HKHKCAMP）