露營場地開放啦！HKCAMP當然要同大家實地考察報道一下啦！今次非常感謝營地，可以比小編係場內拍攝，仲有片睇。
相信最近最熱討嘅郊野公園露營場一定非荃錦露營場地莫屬啦！荃錦營地位於大欖郊野公園內，鄰近荃錦郊野公園管理站，佢亦係首個提供免費網上預約營位服務嘅營地 (網上預約)
大家都可以睇返之前嘅 小編實試荃錦營地預訂文章 * 如果支持我哋繼續拍片記得訂閱我哋嘅YouTube Channel， 萬分感激～
荃錦營地提供37個營位・營位空間很不錯
營地環境清幽，林木茂盛，每個營位都自成一角，空間感充足。露營人士可以俯瞰荃灣及青馬一帶景色，除咗露營仲係熱門遠足郊遊好地方。
每個營位有一個木地台 (大部份木地台為3×3M)、一張有燒烤爐同時可以使用煮食爐嘅枱連櫈， 大家需要係木地台上面紮營， 因此需要注意營帳嘅size， 大家可以參考吓小編當日影嘅相片。我哋大概係三點至四點入到去，都有唔少營友紮緊營啦。
首個需預約嘅政府營地・設露營裝備租用服務
荃錦營地係第一個需要預約嘅政府場地， 一齊睇吓佢同其他場地唔同嘅地方啦。
成功預約嘅朋友首先要去營地服務處， 提供預約資料並取得營卡，就可以直接上去預約咗嘅營位
如果你係新手，營地仲設有露營裝備租用服務，價錢$300起， 呢個對於新手黎講係一個好嘗試
營地亦設有露營守則，希望入嚟玩嘅朋友愛惜大自然，亦唔好騷擾到其他人
谷友木地台紮營小分享
拍攝當日遇上HK CAMP嘅谷友， 佢哋話好好彩book到一晚36號營位， 兩個人亦都買咗好多食物準備開開心心黎露營， 佢哋仲同小編分享咗關於紮營嘅小貼士。
喺香港木地台上紮營並吾多，所以佢哋一早上網買定魚骨釘，方便係地台上紮營。當日佢哋本來想用，但最後發現唔需要。因為木地台上已經有扣釘好俾大家，佢哋試用魚骨釘時因為當日太大風，有鬆脫嘅情況， 所以大家可以衡量個人需要而決定用魚骨釘或者木地台嘅扣， 希望呢個小貼士可以幫助大家啦。
建議大家call車或者搭51號前來
營地無車位提供，如果真係要泊車就要拍喺附近嘅錶位啦，錶位距離營地步行約15分鐘。 如果大家坐車黎嘅話，可以係荃灣如心廣場巴士總站或荃灣港鐵站上蓋巴士站乘搭51號巴士，於「大帽山郊野公園」站落車，落車後步行約5分鐘就到啦。
營地分類垃圾桶・ 為環保出分力
除咗大家最緊張嘅營位之外，營地入邊仲有咩設施呢？
荃錦營地內提供水源、流動廁所、污水穴及中央垃圾收集設施， 但注意水源只有一個，就係辦事處附近。而流動洗手間則設於出入口， 大家可以睇返地圖，為大家嘅露營之旅作好準備啦。
最後離開記得自己垃圾自己帶走呀！營地另一邊出口設有垃圾分類， 大家可以喺呢度將廚餘及可回收嘅垃圾處理好先離開， 好好愛惜及保護營地， 維持美好嘅環境，等大家可以繼續黎玩啦！
小編曾經去過唔少場地拍攝及報道， 大家苦等幾年，終於等到政府營地再次重開，荃錦營地各樣設施感覺非常不錯， 谷友們真係要去試吓， 整體感覺值得一讚。
每晚12點，營地預約系統會開放未來兩個月嘅營位比大家預訂。由於經常爆滿，預約都要碰碰運氣。如果大家預約咗，但最後未能出席嘅話，記得取消返，讓返營位出嚟比其他想去嘅朋友啦。
*再次感謝荃錦營地比我哋拍攝，令到更多熱愛露營嘅朋友可以更加了解營地。
**以後關於露營圖片及分享，記得打Hash Tag（#HKHKCAMP）