之前係谷內經常有谷友分享塔門嘅靚相，係啱啱過咗嘅星期六，小編們都去左一轉塔門， 但我哋今次唔係去露營。
今次好開心 HKCAMP得到品牌Patagonia嘅邀請，參加咗【𝐑𝐞𝐆𝐢𝐟𝐭 𝐓𝐨 𝐏𝐚𝐬𝐬 𝐃𝐨𝐰𝐧 企劃之淨灘清徑堅毅行】嘅義工活動。清淨海灘及山徑， 甘有意義嘅活動， HKCAMP同事們當然要身體力行齊齊撐啦！
結合三方力量 一齊展開淨灘清徑大行動
相信大家對Patagonia呢個品牌都唔會陌生，咁多年來品牌對推動環保文化都不遺餘力。今次結合海洋拾荒者Kitti、清徑先鋒、毅行教室，一齊展開拾荒活動，真係好有意義。
雖然當日天氣非常酷熱，但都擋唔住大家嘅熱誠。大家一行約80人，帶齊裝備浩浩蕩蕩出發上山下海清垃圾。
從小開始培養保育大自然理念
今次拾荒行動分為三個級別，從入門級行到高端毅行級，參加者年紀最細嘅小義工只有8歲。 希望透過參加呢類有意義嘅活動，將保育大自然理念從小培養再傳承落去。
第一站黎到入門版塔門弓背灣
唔好睇小義工年紀小小，佢哋全部都係熟手技工， 一個箭步就從沙灘岸邊開始淨灘。大家都好落力呀。
第二站由毅行教室帶領大家到達疊石
前往疊石拾荒嘅目的地需要行上山坡再行落海灘，無毅行經驗嘅小編都有懷疑自己係咪可以完成，但只要相信自己， 一步一步走，就可以做到。環境保育都係一樣， 一個人嘅力量有限，但只要有心， 一步一步就可以做到。
而且沿路風景真係靚到無朋友，大自然帶比大家休憩好景色，所以幾辛苦都值得。
第三站由清徑先鋒帶領一行30個義工到達車灣
呢站係最困難嘅。由清徑先鋒帶領約30個義工，一齊攀越約30分鐘路程到達目的地車灣。呢段路程少啲腳骨力同體力都好難應付。 但車灣都係今次活動拾荒最多嘅地段之一。
大家兵分三路，好快就將帶黎嘅垃圾袋載到滿滿啦。完成行動後，主辦商非常細心提供飲品食物比大家享用。大家都有自備餐具， 非常乖呀！
積小成多 耳濡目染 將保育理念栽種成蔭
大家見到海灘可能以為好乾淨，但走近一啲就會發現周圍都係膠樽， 發泡膠。 甚至有煮食爐等等。小編執咗一陣已經執滿一大袋。今次行動總供執咗134袋垃圾，合共550kg，數量非常驚人。
作為喜歡親近大自然嘅露營愛好者，享受大自然帶比我哋嘅資源靚景外，都可以出一分力。好簡單從「自己垃圾自己帶走」、做好垃圾分類、少用塑膠產品開始，慢慢培養成習慣。積少可以成多，露營新態度就從今日開始踏出第一步啦！再次謝謝所有為大自然出過力嘅朋友。
塔門草地及牛牛現況
最後同大家Update塔門草地情況，草開始慢慢出返啲，當日亦見有人露營。大家去塔門記得要好好保護草地， 自己垃圾自己帶走。
今次HKCAMP好榮幸可以參與其中，為環境出一份力。如果有下次，吾知谷友們又有冇興趣一齊參加呢！大家不妨留言話比我哋知道啦。
約定大家，我哋山上見～
*相片及資料來源: HKCAMP **以後關於露營圖片及分享，記得打Hash Tag（#HKHKCAMP）