不知不覺「營」人必去已經黎到EP18啦! 小編係呢一年間跟住大家嘅建議到訪過唔同大大小小嘅露營場地. 十月露營開季, HKCAMP小編當然繼續默默地睇睇各大露營場有冇新update啦!
今次小編想同大家分享一個「隱世・山野」，係小編到訪過感覺最寧靜嘅私人營地。唔好以為佢「隱世」就位置偏僻呀，場地位於元朗新潭路旁，無論大家渣車坐車一樣方便。而且場地私隱度高， 鍾意靜悄悄Chill一Chill， 享受大自由單純寧靜感覺嘅朋友就一定要留意啦。
場地位置便利 駕車坐車超方便
隱世意思並唔係位置偏僻嘅象徵， 相反營地交通非常方便，位於元朗新潭路鄉村會旁嘅「隱世・山野」就係大馬路旁邊，駕車嘅朋友即使係P牌都容易駕馭，而且營地前方就係停車場，方便營友停泊，即使大家坐車都可以直接到達營地，超級易搵。
被山野環抱私隱度高
營地建設係山下, 被山包圍住, 感覺非常寧靜. 鍾意靜靜地享受大自然嘅朋友就岩哂啦. 雖然營地唔算大, 但整個營區劃分清晰. 每個營區位置都非常寬敞, 大家唔洗擔心會營貼營, 而且營區之間都相隔一段距離, 唔洗擔心同朋友傾計會被人聽到, 私隱度Up!
設施齊備 水壓夠 疏水系統佳
場地除咗有冷熱水淋浴間, 洗手間外, 仲有雪櫃提供. 小編到訪當日, 有營友同小編分享場地嘅水壓非常充足, 所以水龍頭水源源源不絕, 要清洗食物呢個真係好重要呀.
另一個值得一讚又令小編驚喜嘅地方係, 場地疏水系統做得非常好. 到訪前一日及到訪當日上午都不停落雨, 本來以為場地一次會有水氹. 但到達後發現場內無積水無水氹, 場地管理員同小編分享因為疏水系統做得好, 所以唔會積聚雨水, 大家就唔洗擔心大雨過黎會水浸啦.
落足心機親自培植草地
對於營友黎講, 一片靚草地係非常重要. 營地明白大家需要, 所以親自培植草地. 從播種培植到草地復修都落咗唔少心機, 所以大家黎玩就可以享受一片綠油油嘅草地啦.
營友推介 係三五知己嘅聚腳地
每次到訪營地, 小編都鍾意同大家傾下偈. 今日認識咗一班經驗豐富嘅營友. 原來佢地從中學時期就開始玩露營, 到依家仍然會約埋一齊露一露. 唔講唔知, 原來佢地都係「隱世・山野」嘅熟客, 推介營地比鍾意享受大自然嘅朋友.
當日佢地仲同小編分享咗佢地嘅Gear, 希望將來露營可以再見到大家, 一齊分享.
對營地有興趣嘅朋友, 想查詢及預約，請按以下連結！
歡迎大家報料，同我哋分享正嘅營地，或者大家想睇嘅場地介紹！等緊你！
約定大家, 我哋營地相遇!
**以上圖片及資料來源: HKCAMP
**以後關於露營圖片及分享，記得打Hash Tag（#HKHKCAMP）
相關資訊: